Rezidenturaya qəbul imtahanının birinci mərhələsində – baza fənləri üzrə biliklərin qiymətləndirilməsində 40 və daha yüksək bal toplayaraq “məqbul” nəticə əldə etmiş və qəbul şərtlərinə cavab verən namizədlər ikinci mərhələdə iştirak hüququ qazanıblar.

Azmedinfo.az xəbər verir ki, ixtisas fənləri üzrə keçiriləcək növbəti imtahana yazılmaq istəyən şəxslər iyulun 22-dən 30-u saat 23:59-dək Dövlət İmtahan Mərkəzinin rəsmi portalındakı “Şəxsi kabinet” bölməsində hesablarına müvafiq məbləği əlavə etməli və qeydiyyatdan keçməlidirlər.

DİM-dən bildirilib ki, qeydiyyat prosesini başa vurmayan namizədlər ixtisas fənləri üzrə qiymətləndirmə imtahanına buraxılmayacaqlar.

Qeyd edək ki, baza fənləri üzrə “məqbul” nəticə qazanan şəxslər yalnız əsas tibb təhsilini (baza ali təhsili) tamamlamaqla ixtisas fənləri üzrə mərhələyə daxil ola bilərlər.

İxtisas imtahanlarının 2025-ci il avqustun 10-da Bakı və Naxçıvan şəhərlərində təşkili nəzərdə tutulur.