Azərbaycan Respublikası Səhiyyə Nazirliyinin Elmi-Tədqiqat Ağciyər Xəstəlikləri İnstitutu tərəfindən Şamaxı Rayon Mərkəzi Xəstəxanasında "Vərəmin aşkarlanması, diaqnostikası, müalicəsi və profilaktikasına müasir yanaşmalar" mövzusunda regional praktik təlim keçirilib.

Azmedinfo.az xəbər verir ki, tədbirdə Şamaxı Rayon Mərkəzi Xəstəxanasının direktoru İmran Qurbanov, Elmi-Tədqiqat Ağciyər Xəstəlikləri İnstitutunun şöbə müdiri Mehriban Seyfətdinova, institutun həkim-ftiziatrı Aysel Aslanova, həmçinin Şamaxı, İsmayıllı, Ağsu və Qobustan rayonlarının İlkin Səhiyyə Xidmətinin həkimləri iştirak ediblər.

Təlimin əsas məqsədi İlkin Səhiyyə Xidmətinin vərəmin erkən aşkarlanması, nəzarətli müalicəsi və profilaktikasında rolunun gücləndirilməsi olub.

Çıxış edənlərdən Milli İstinad Laboratoriyasının şöbə müdiri Mehriban Seyfətdinova və Poliklinika şöbəsinin həkim-ftiziatrı Aysel Aslanova, vərəmin müasir klinik protokollar əsasında diaqnostikası və müalicəsi barədə geniş təqdimatlarla çıxış ediblər. Onlar, həmçinin İSX həkimlərinin bu sahədəki önəmli rolu barədə ətraflı məlumat veriblər.

İnteraktiv şəkildə davam edən tədbirdə müxtəlif mövzular ətrafında müzakirələr aparılıb, iştirakçıların sualları ətraflı şəkildə cavablandırılıb.