25-26 iyul tarixlərində Çin Xalq Respublikasının Sincan Uyğur Muxtar Vilayətinin Urumçi şəhərində 6-cı "Kəmər və Yol" Akademik Forumu keçiriləcək.

Azmedinfo.az-a verilən məlumata görə, ölkəmizi Forumda təmsil edən Azərbaycan Respublikası Səhiyyə Nazirliyinin Elmi-Tədqiqat Kardiologiya İnstitutunun direktoru, professor Gülnaz Dadaşova və institutun böyük elmi işçisi, tibb üzrə fəlsəfə doktoru Vüsal Hacıyev Forum çərçivəsində bu gün Sincan Uyğur Muxtar Vilayətinin Xalq Xəstəxanasının fəaliyyəti ilə yaxından tanış olublar.

Ziyarət zamanı bildirilib ki, bu tibb müəssisəsində 5000-dən çox əməkdaş, o cümlədən yüzlərlə təcrübəli həkim və professor çalışır. Xəstəxana ildə 2 milyondan çox ambulator xəstəyə xidmət göstərir, burada 90 mindən çox cərrahi əməliyyat həyata keçirilir. Müasir tibbi texnologiyalarla təchiz olunan mərkəzdə robotik cərrahiyyə geniş tətbiq olunur. Qeyd edilib ki, xəstəxana 2000 km məsafədə yerləşən xəstələrə belə robotlar vasitəsilə angioqrafiya, stent implantasiyası və müxtəlif əməliyyatlar həyata keçirmək imkanına malikdir. Burada eyni zamanda ürək, böyrək və ağciyər transplantasiyası uğurla icra edilir.

Xəstəxana həmçinin elmi-tədris mərkəzi funksiyasını yerinə yetirir və bir sıra milli və regional ixtisaslar üzrə həkim hazırlığı həyata keçirilir. Bununla yanaşı, müəssisə Çin Səhiyyə Nazirliyi tərəfindən beynəlxalq təcili yardım mərkəzi kimi də tanınıb.

Xəstəxana rəhbərliyi ilə keçirilən görüş zamanı professor Gülnaz Dadaşova qeyd edib ki, Sincan regionunda səhiyyənin inkişafında mühüm rol oynayan bu mərkəz, beynəlxalq əməkdaşlıq və akademik mübadilələr üçün də önəmli platforma hesab olunur. O bildirib ki, bu cür təcrübə mübadiləsi və əlaqələr, Azərbaycan ilə Çin arasında səhiyyə əməkdaşlığına əhəmiyyətli töhfələr verəcək.