Çinin Sincan Uyğur Muxtar Rayonunun mərkəzi Urumçi şəhərində 6-cı "Kəmər və Yol" Akademik Forumu keçirilirb. Tədbir həm "Kəmər və Yol" təşəbbüsünün elmi və tibbi əməkdaşlıq aspektlərini önə çıxarır, həm də Sincan Uyğur Muxtar Rayonunun yaranmasının 70 illik yubileyi ilə əlaqələndirilib. Forumun keçirilməsi Çinin 14-cü beşillik inkişaf planının son mərhələsinə təsadüf etməsi ilə də əlamətdardır.

Azmedinfo.az xəbər verir ki, Forum dünyanın müxtəlif ölkələrindən tanınmış səhiyyə ekspertlərini, elmi tədqiqat mərkəzlərinin nümayəndələrini və nüfuzlu təşkilatların rəhbərlərini bir araya gətirib. Azərbaycanı bu nüfuzlu platformada Səhiyyə Nazirliyinin Elmi-Tədqiqat Kardiologiya İnstitutunun direktoru, professor Gülnaz Dadaşova və institutun böyük elmi işçisi, tibb üzrə fəlsəfə doktoru Vüsal Hacıyev təmsil edirlər.

Professor G.Dadaşova forum çərçivəsində "Azərbaycanda icbari tibbi sığorta sisteminin tətbiqindən əvvəl və sonrakı səhiyyə mənzərəsi" mövzusunda çıxış edib. V.Hacıyev isə kardioloji xidmətin cari çağırışlarını əhatə edən "Ürək-damar xəstəliklərindən ölüm hallarının azaldılmasında kardiologiyanın rolu" adlı məruzəsini təqdim edib. Hər iki təqdimat iştirakçılar tərəfindən maraqla qarşılanıb.

Tədbir zamanı Azərbaycan Səhiyyə Nazirliyinin Elmi-Tədqiqat Kardiologiya İnstitutu ilə Sincan Uyğur Muxtar Rayonunun Xalq Xəstəxanası arasında kardiologiya sahəsində əməkdaşlığa dair Anlaşma Memorandumu imzalanıb. Professor Gülnaz Dadaşovanın sözlərinə görə, bu sənəd Azərbaycanın beynəlxalq səhiyyə platformasında mövqeyinin möhkəmlənməsi və əhalinin daha keyfiyyətli tibbi xidmətlə təmin olunması istiqamətində mühüm addımdır.

Forum iştirakçıları Sincan Uyğur Muxtar Vilayətinin Xalq Xəstəxanası ilə yaxından tanış olublar. Qeyd olunub ki, bu tibb müəssisəsi hər il 2 milyondan artıq ambulator xəstəyə xidmət göstərir, burada ildə 90 mindən çox cərrahi əməliyyat icra olunur. Xəstəxana ən müasir tibbi texnologiyalarla təchiz edilib və burada robotik cərrahiyə uğurla tətbiq edilir. Hətta 2 min kilometr uzaqlıqda yerləşən xəstələrə belə robotlar vasitəsilə angioqrafiya və stend qoyulması kimi prosedurlar həyata keçirilir. Burada, həmçinin, ürək, böyrək və ağciyər transplantasiyası da uğurla icra olunur.

Azərbaycan nümayəndələrinin bu beynəlxalq forumda iştirakı ölkəmizin səhiyyə sistemində əldə olunan nailiyyətlərin dünya səviyyəsində tanıdılması, elmi əməkdaşlığın möhkəmlənməsi və regionlararası tibbi əlaqələrin inkişafı baxımından əhəmiyyətli hadisədir.

Qeyd edək ki, son illər Azərbaycan ilə Çin arasında səhiyyə sahəsində əməkdaşlıq xüsusilə nəzərəçarpacaq dərəcədə inkişaf edib. Cari ilin aprelində səhiyyə naziri Teymur Musayevin Çinə səfəri zamanı keçirilən beynəlxalq forumda iştirak etməsi, o cümlədən ölkəmizdə aparılan islahatlar, rəqəmsallaşma təşəbbüsləri və tibdə yeni texnologiyaların tətbiqi ilə bağlı verdiyi çıxışlar bu əlaqələrin genişlənməsinə töhfə verib.