Yeni Klinikada ozon terapiya və regenerativ tibbin imkanları müzakirə olunub

Yeni Klinikada ozon terapiya və regenerativ tibbin imkanları müzakirə olunub

27 İyul 2025

1058

Yeni Klinikada “Ozon terapiya və regenerativ yibb tətbiqləri” mövzusunda elmi seminar təşkil olunub. Tədbirin əsas məqsədi müasir tibbi yanaşmaların paylaşılması, bu sahədə nəzəri və praktiki biliklərin təkmilləşdirilməsi olub.

Azmedinfo.az xəbər verir ki, seminarda TƏBİB-in İcraçı direktorunun müşaviri, Yeni Klinikanın direktor müavini, Somatika və Yeni Robotik Reabilitasiya Mərkəzinin rəhbəri Pərvin Əkbərov, Türkiyədən dəvət olunmuş Ege Universiteti Tibb Fakültəsi Xəstəxanasının Anesteziya və reanimasiya şöbəsinin alqologiya üzrə tədris elmi işçisi Prof.Dr. Can Eyigör həmçinin müxtəlif ixtisaslardan olan həkim-mütəxəssislər iştirak ediblər.

Açılış mərasimində çıxış edən Yeni Robotik Reabilitasiya Mərkəzinin şöbə müdiri Aytən Ağalarova Pərvin Əkbərovun rəhbərliyi ilə təşkil olunan bu kimi seminarlar sayəsində müasir cihaz və avadanlıqların beynəlxalq təcrübə əsasında yerli səhiyyə sisteminə inteqrasiyasının sürətləndiyini, həmçinin tibbi personalın bilik və bacarıqlarının artırılmasına mühüm töhfə verildiyini vurğulayıb.

Seminar zamanı çıxış edən Prof. Dr. Can Eyigör ozon terapiyası və regenerativ tibbin son illərdə alternativ və tamamlayıcı tibb sahəsində yüksələn tendensiyalardan biri olduğunu bildirib. O vurğulayıb ki, bu müalicə üsulları bədənin özünü bərpaetmə qabiliyyətini aktivləşdirərək iltihabın azaldılmasına, toxuma yenilənməsinə və ümumilikdə sağalma müddətinin sürətlənməsinə töhfə verir.

Tədbirin praktiki hissəsi Yeni Robotik Reabilitasiya Mərkəzində keçirilib. Burada iştirakçılara ozon terapiyası və regenerativ tibb prosedurlarının icrası ilə bağlı təqdimat nümayiş etdirilib. Eyni zamanda mərkəzdə mövcud olan avadanlıq, tətbiq olunan müalicə protokolları və pasiyent yönümlü yanaşmalar barədə ətraflı məlumat verilib. Seminarda regenerativ tibb sahəsində tətbiq edilən PRP (trombositlə zəngin plazma) və kök hüceyrə müalicələrinin oynaq problemləri, əzələ və bağ zədələri, idman travmaları və qığırdaq degenerasiyası kimi klinik hallarda geniş istifadə olunduğu qeyd olunub.

Beynəlxalq təcrübənin yerli praktikaya inteqrasiyası və həkimlərin biliklərinin artırılması baxımından mühüm əhəmiyyət daşıyan eyni zamanda interaktiv formada baş tutan seminar sual-cavab sessiyası ilə yekunlaşıb.