TƏBİB-in İcraçı direktoru Vüqar Qurbanovun təqdimatı əsasında ölkənin müxtəlif bölgələrində yerləşən bir sıra tibb müəssisələrinə yeni rəhbər şəxslər təyin olunub.

Azmedinfo.az xəbər verir ki, Qurumdan verilən məlumata əsasən, bu dəyişikliklər tibbi idarəçiliyin daha da təkmilləşdirilməsi məqsədi daşıyır.

Yeni kadr təyinatlarına əsasən:

Şamaxı Rayon Mərkəzi Xəstəxanasına direktor vəzifəsini infeksionist Natiq Əliyev icra edəcək. O, bu təyinata qədər Hacıqabul Rayon Mərkəzi Xəstəxanasının direktoru olub.

Qusar Rayon Mərkəzi Xəstəxanasına cərrah ixtisaslı İmran Qurbanov rəhbərlik edəcək. O, sonadək Şamaxı xəstəxanasına rəhbərlik edib.

Yardımlı Rayon Mərkəzi Xəstəxanasının direktoru postuna Ravil Qənbərov təyin olunub. O, həmin müəssisənin İlkin səhiyyə xidmətləri şöbəsinin müdiri olub.

Hacıqabul Rayon Mərkəzi Xəstəxanasında direktor vəzifəsini terapevt Xəqani Abasov icra edəcək. O, eyni müəssisədə keyfiyyətə nəzarət üzrə mütəxəssis kimi çalışıb.

Bundan əlavə:

Sabunçu Tibb Mərkəzində cərrahi xidmətlər üzrə direktor müavini vəzifəsinə Kamil Hacıyev,

Xətai Tibb Mərkəzində direktor müavini və baş həkim vəzifəsinə Sevda Əliyeva,

Tovuz Rayon Mərkəzi Xəstəxanasında cərrahi xidmətlər üzrə direktor müavini vəzifəsinə Faiq Vəliyev,

Lənkəran Rayon Mərkəzi Xəstəxanasında terapevtik xidmətlər üzrə direktor müavini postuna isə Eyvaz Məmmədov gətirilib.

Yeni təyin olunan müavinlərin hamısı sözügedən müəssisələrdə müxtəlif məsul vəzifələrdə çalışmış təcrübəli mütəxəssislərdir. Onların bu vəzifələrə gətirilməsi, bölgələrdə tibbi xidmətin keyfiyyətinin yüksəldilməsinə xidmət edəcək.