Yeni Klinikada cəmiyyətdə orqan donorluğu haqqında məlumatlılığı artırmaq, bu sahədə ictimai dəstəyin formalaşdırılmasını təşviq etmək məqsədilə “Mən nə üçün donor olmaq istəyirəm?” adlı maarifləndirici tədbir təşkil olunub.

Azmedinfo.az xəbər verir ki, tədbirdə Səhiyyə Nazirliyinin tabeliyində fəaliyyət göstərən Orqan Donorluğu və Transplantasiya üzrə Koordinasiya Mərkəzinin sədr müavini Günay Abbasova, Yeni Klinikanın direktoru Barat Yusubov, direktor müavini, Cərrahiyyə və Transplantasiya Mərkəzinin rəhbəri Eldar Əhmədov, eləcə də tibb müəssisəsinin əməkdaşları iştirak ediblər.

Günay Abbasova tədbirdə çıxış edərək, donorluğun müxtəlif növləri, ölümdən sonra donor olma prosesi, müxtəlif ölkələrdə tətbiq olunan razılıq prinsipləri və hüquqi çərçivələr, həmçinin real həyat hadisələri barədə ətraflı təqdimatla çıxış edib. Onun təqdimatı iştirakçılarda bu sahəyə dair geniş və aydın təsəvvür yaradıb.

Yeni Klinikanın direktoru Barat Yusubov öz çıxışında cəmiyyətdə orqan donorluğuna dair düşüncələrin formalaşmasında maarifləndirmə işlərinin vacibliyini xüsusi vurğulayıb. O bildirib ki, orqan transplantasiyası yalnız bir insanın həyatını xilas etmir, eyni zamanda onlarla ailənin taleyinə ümid və işıq bəxş edir. Onun fikrincə, bu sahədə bilik və anlayışın artırılması tibb mütəxəssislərinin həm peşə borcu, həm də mənəvi məsuliyyətidir.

Direktor müavini Eldar Əhmədov çıxışında transplantasiya sahəsindəki mövcud vəziyyət, klinik təcrübələr, eləcə də Yeni Klinikada bu istiqamətdə atılan mühüm addımlar, həyata keçirilmiş əməliyyatlar və formalaşdırılan ixtisaslı tibbi komandalar haqqında məlumat verib.

Tədbirin sonunda Barat Yusubov, Eldar Əhmədov və tibb müəssisəsinin bir sıra əməkdaşları ölümdən sonra donor olmaqla bağlı Səhiyyə Nazirliyinin Kollegiyası tərəfindən təsdiq edilmiş razılıq ərizələrini imzalayıblar. Bu addım həm şəxsi nümunə, həm də cəmiyyətə verilmiş mənəvi mesaj kimi yüksək dəyərləndirilib.