TƏBİB-in İcraçı direktoru Vüqar Qurbanovun təqdimatı əsasında ölkənin bir sıra tibb müəssisələrində rəhbər heyətdə dəyişikliklər edilib.

Azmedinfo.az xəbər verir ki, qurumdan verilən məlumata görə, Şamaxı Rayon Mərkəzi Xəstəxanasına Natiq Əliyev, Qusar Rayon Mərkəzi Xəstəxanasına İmran Qurbanov, Yardımlı Rayon Mərkəzi Xəstəxanasına Ravil Qənbərov, Hacıqabul Rayon Mərkəzi Xəstəxanasına isə Xəqani Abasov direktor təyin olunublar.

Yeni təyinat alan rəhbərlərin peşə ixtisasları və əvvəlki vəzifələri də açıqlanıb. Belə ki, infeksionist Natiq Əliyev daha öncə Hacıqabul Rayon Mərkəzi Xəstəxanasına rəhbərlik edib. Cərrah ixtisaslı İmran Qurbanov isə Şamaxı xəstəxanasında direktor vəzifəsində çalışıb. Yardımlı RMX-nın yeni rəhbəri Ravil Qənbərov həmin tibb müəssisəsində İlkin səhiyyə xidmətləri şöbəsinin müdiri olub. Terapevt Xəqani Abasov isə indiyədək Hacıqabul RMX-da keyfiyyətə nəzarət sahəsində fəaliyyət göstərib.

Bundan əlavə, Sabunçu, Xətai, Tovuz və Lənkəran rayonlarında fəaliyyət göstərən tibb müəssisələrinə də yeni direktor müavinləri təyin olunub. Kamil Hacıyev Sabunçu Tibb Mərkəzində cərrahi xidmətlər üzrə direktor müavini, Sevda Əliyeva Xətai Tibb Mərkəzində baş həkim – direktor müavini, Faiq Vəliyev Tovuz RMX-nın cərrahi xidmətlər üzrə müavini, Eyvaz Məmmədov isə Lənkəran RMX-da terapevtik xidmətlər üzrə direktor müavini vəzifələrinə gətirilib.

Təyin olunmuş şəxslər daha əvvəl də müxtəlif tibb müəssisələrində məsul vəzifələrdə çalışıblar.