Tədbirin açılışı institutun direktoru, dosent Aynur Poluxovanın nitqi ilə başlayıb. O, ana südü ilə qidalanmanın uşağın sağlam inkişafındakı əvəzsiz rolundan danışaraq qeyd edib ki, ana südü yalnız qida mənbəyi deyil, həm də körpənin immun sisteminin möhkəmlənməsi və müxtəlif infeksiyalardan qorunması üçün ən ideal vasitədir. Eyni zamanda əmizdirmə dövründə döşə düzgün qulluq qaydalarına da toxunub. O, qeyd edib ki, analar gigiyena qaydalarına əməl etməli, əmizdirmədən əvvəl və sonra döş giləsini təmiz su ilə yumalı, qıcıqlanma və çatların qarşısını almaq üçün döşə qulluq vasitələrindən istifadə etməlidirlər. Düzgün qulluq həm ananın sağlamlığı, həm də körpənin infeksiyalardan qorunması baxımından vacibdir. O həmçinin institutda yaradılan “Analar məktəbi” tədbirləri çərçivəsində analara göstərilən dəstəyin və maarifləndirmə işlərinin davamlı olacağını vurğulayıb, institutun bu istiqamətdə fəaliyyətini genişləndirdiyini qeyd edib.

 

Daha sonra ETPÍ-nin Pediatriya elmi bölməsinin rəhbəri Günay Salehova və kiçik elmi işçi Aygün Abbasəliyeva ana südünün əhəmiyyəti, onun tərkibi, uşağın inkişafına təsiri və düzgün əmizdirmə texnikaları barədə təqdimatla çıxış ediblər. Onlar ana südünün ilk 6 ay ərzində körpə üçün bütün qida və maye tələbatını tam qarşıladığını xüsusi vurğulayıblar.

 

Tədbirdə institutun elmi katibi, dosent Sevinc Nəsirova çıxış edərək ana südünün həm uşaq, həm də ana sağlamlığı üçün faydalarını elmi faktlarla əsaslandırıb. O, həmçinin anaların bu mövzuda maarifləndirilməsinin vacibliyini qeyd edib və bu cür tədbirlərin davamlı keçirilməsinin əhəmiyyətini vurğulayıb.

 

Tədbirin sonunda anaların sualları cavablandırılıb, əmizdirmə ilə bağlı praktiki məsləhətlər verilib və maarifləndirici materiallar paylanıb. Tədbir analar tərəfindən böyük maraqla qarşılanıb və yüksək qiymətləndirilib.