Azərbaycan Respublikasının İnsan hüquqları üzrə müvəkkili (Ombudsman) Səbinə Əliyevanın tapşırığına əsasən Milli Preventiv Mexanizm mandatı çərçivəsində, habelə "Psixi sağlamlıq və insan hüquqları" üzrə yaradılmış İşçi qrupun fəaliyyəti çərçivəsində bir sıra psixi sağlamlıq müəssisələrinə baxış keçirilib.

Azmedinfo.az xəbər verir ki, Ombudsman Aparatının yaydığı məlumata görə, bu çərçivədə Səhiyyə Nazirliyinin tabeliyində fəaliyyət göstərən 2 nömrəli Klinik Psixiatriya Xəstəxanası və Bakı şəhəri Narkoloji Mərkəzinə monitorinq xarakterli başçəkmələr təşkil olunub.

Həyata keçirilən bu tədbirlər BMT-nin “İşgəncə və digər qəddar, qeyri-insani və ya ləyaqəti alçaldan rəftar və ya cəza əleyhinə Konvensiyası”nın Fakültativ Protokoluna, "Azərbaycan Respublikasının İnsan hüquqları üzrə müvəkkili (ombudsman) haqqında" Konstitusiya Qanununa, həmçinin “Psixiatriya yardımı haqqında” qanuna əsasən icra edilib.

Monitorinqin əsas məqsədi adıçəkilən müəssisələrdə xəstələrlə rəftar, tibbi xidmətin keyfiyyəti və müalicə şəraitinin mövcud vəziyyətini qiymətləndirmək, pasiyent hüquqlarının təmin olunması ilə bağlı məsələləri araşdırmaqdan ibarət olub.

2 nömrəli Klinik Psixiatriya Xəstəxanasında həm ambulator, həm də stasionar müalicə xidmətləri göstərildiyi müəyyən olunub. Əvvəlki monitorinqlər zamanı aşkarlanan bir sıra çatışmazlıqların aradan qaldırıldığı, vakant iş yerlərinə yeni əməkdaşların təyin edildiyi və təmir işlərinin aparıldığı qeyd edilib. Eyni zamanda, xəstələrin sənədləşmə prosesi, açıq havada gəzinti imkanları və ümumi yaşayış şəraitinin yaxşılaşdırılması ilə bağlı əlavə tövsiyələr də verilib.

Bakı şəhəri Narkoloji Mərkəzinə edilən baxış zamanı isə müəssisənin yalnız ambulator xidmət göstərdiyi məlum olub. Lakin həkim sayının azlığı və binanın fiziki məkanının məhdudluğu da diqqətə çatdırılıb.

Başçəkmələrin sonunda müəssisə rəhbərliyinə hüquqi məsələlərlə bağlı maarifləndirici məlumatlar təqdim olunub, eyni zamanda Ombudsman Aparatının çap məhsulları və “916” Çağrı Mərkəzi barədə məlumat lövhələri paylanılıb.

Ombudsman Aparatından bildirilib ki, hər iki müəssisənin daha geniş və müasir binalara köçürülməsi nəzərdə tutulur. Bununla belə, bu prosesin sürətləndirilməsi zəruri hesab olunur. Monitorinqlər zamanı qeydə alınmış nöqsanlarla bağlı aidiyyəti üzrə Səhiyyə Nazirliyinə rəsmi müraciət olunacaq.