Avstraliya Oftalmologiya Cəmiyyəti (AOC) Beynəlxalq Oftalmologiya Gününə həsr olunmuş ilk beynəlxalq rəsm müsabiqəsinə başlayıb. Müsabiqəyə bütün yaş qruplarından olan iştirakçılar qoşula bilərlər.

Azmedinfo.az xəbər verir ki, AOC-nin baş direktoru Katrin Ronne bu beynəlxalq təşəbbüsün ümumi məqsədini belə şərh edib: "İncəsənəti çox vaxt birləşdirici amil adlandırırlar və bizim bu ilki məqsədimiz də budur. Ümumdünya Oftalmoloqlar Gününə həsr olunmuş beynəlxalq hərəkata başladıq. Biz istəyirik ki, dialoq və səslər artmağa davam etsin – xüsusən də xaricdəki dostlarımız və həmkarlarımızla".

Qeyd edək ki, 2004-cü ildən etibarən hər il avqust ayının 8-i bütün dünyada Beynəlxalq Oftalmologiya Günü kimi qeyd olunur. Bu gün dünyanın dörd bir tərəfindən olan oftalmoloq cərrah və həkimlər öz ideya və nailiyyətlərini bölüşdükləri konfrans və simpoziumlar, müxtəlif səhiyyə tədbirləri keçirilir. Bayram həm də bu sahədə kəşflər etmiş və ya işində mühüm nəticələr əldə etmiş oftalmoloqların mükafatlandırılması ilə əlamətdardır. Mütəxəssislərə göz xəstəliklərinin diaqnostikası və müalicəsi üçün yeni cihazlar və tibbi avadanlıqlar nümayiş etdirilir.

Beynəlxalq Oftalmologiya Günündə bir çox oftalmoloji mərkəz və institutlar vətəndaşlara ödənişsiz konsultasiya, diaqnostika xidməti göstərir, hətta bəzi cərrahi əməliyyatlar icra edirlər.