TƏBİB və Yeni Klinikanın Almaniyanın nüfuzlu səhiyyə idarəetmə şəbəkələri olan “Falk Beratung” və “Sana Hospital Group” ilə əməkdaşlığı uğurla davam etdirilir. Tərəflər arasında keçirilən növbəti görüş bunun bariz göstəricisidir.

Azmedinfo.az xəbər verir ki, almaniyalı nümayəndə heyətinin 3 günlük səfəri çərçivəsində Yeni Klinikanın direktoru Barat Yusubovla görüş keçirilib.

Həmçinin bu tibb müəssisəsinin Xəstə xidmətləri və Terapiya şöbələrində icra edilən tibbi xidmətlər, onların yerinə yetirilməsinə dair təlimat sənədləri nəzərdən keçirilib, mövcud təcrübə və yanaşmalar qiymətləndirilib.

Bununla yanaşı, bu ilin birinci yarısında tərəflər arasında imzalanmış müqavilədən irəli gələn məsələlərin icra vəziyyəti geniş müzakirə olunub.

Keyfiyyətin idarə olunması sahəsində tətbiq edilən yeniliklər, beynəlxalq əməkdaşlığın gücləndirilməsi, tibbi heyətin, xüsusilə də tibb bacılarının peşəkar inkişafı və ümumi xidmət keyfiyyətinin artırılması istiqamətində həyata keçirilən tədbirlər ətrafında geniş fikir mübadiləsi aparılıb.

Əməliyyatxana bölməsinin və Sterilizasiya şöbəsinin fəaliyyəti beynəlxalq keyfiyyət standartları kontekstindən təhlil olunub, qarşılıqlı əməkdaşlığın gələcək perspektivləri müzakirə olunub.