Dünən Dövlət İmtahan Mərkəzi baza ali tibb təhsili əsasında həkim-mütəxəssislərin hazırlanması məqsədilə rezidenturaya qəbul imtahanının ikinci mərhələsini – ixtisas fənləri üzrə biliklərin yoxlanılmasını təşkil edib.

Azmedinfo.az xəbər verir ki, imtahan prosesi Bakı şəhərində dörd, Naxçıvanda isə bir binada baş tutub. Saat 10:00-da başlayan imtahan 2 saat 30 dəqiqə davam edib. Namizədlərin buraxılışı saat 09:45-də yekunlaşıb və bu vaxtdan sonra gələnlər binaya daxil ola bilməyiblər.

İştirak üçün 905 nəfər qeydiyyatdan keçib: onlardan 336-sı kişi, 569-u qadın, 739-u Azərbaycan, 169-u isə rus bölməsinin məzunudur. Cari ilin məzunları 373 nəfər, əvvəlki illərin məzunları isə 532 nəfər təşkil edib. İki nəfər xarici vətəndaş da imtahanda iştirak edib. Bakı üzrə 879, Naxçıvan üzrə isə 26 namizədin iştirakı nəzərdə tutulub.

İmtahanın idarə olunması üçün 5 baş nəzarətçi, 11 imtahan rəhbəri, 81 zal nəzarətçisi və 12 mühafizə əməkdaşı vəzifələndirilib. Protokolların və cavab kartlarının emalı avqustun 11-dən başlayacaq, nəticələrin isə 3 gün ərzində açıqlanması planlaşdırılır.