Türkiyənin Balıkesir vilayətinin Sındırqı rayonunda qeydə alınan 6,1 bal gücündə zəlzələ ciddi fəsadlara səbəb olub. Uçan binanın dağıntıları altından çıxarılan dörd nəfərdən biri həyatını itirib. Bu barədə ölkənin daxili işlər naziri Ali Yerlikaya məlumat verib.

Azmedinfo.az xəbər verir ki, nazirin sözlərinə görə, zəlzələ nəticəsində ümumilikdə 16 tikili dağılıb, lakin onlardan yalnız dördündə yaşayış var idi. Hazırda xəsarət alan 29 nəfər müxtəlif xəstəxanalarda müalicə olunur. Səhərin ilk saatlarından etibarən bölgədə dəyən ziyanın qiymətləndirilməsi üzrə araşdırmalara başlanılacaq.

AFAD-ın son açıqlamasına əsasən, əsas təkanlardan sonra bölgədə beş baladək gücdə 20 afterşok qeydə alınıb. Axtarış-xilasetmə əməliyyatlarına 319 nəfərlik heyət və 79 texnika cəlb olunub, Fövqəladə Halların İdarəetmə Mərkəzləri fəaliyyətə başlayıb. Təcili Çağırış Mərkəzinə 24 zərər barədə müraciət daxil olub və ərazidə yoxlamalar davam edir.

İlkin məlumata görə, dağıntılar altında qalan iki nəfər xilas edilib, daha ikisinin axtarışına isə davam olunub. Sındırqı Bələdiyyəsinin başçısı Serkan Sak bildirib ki, uçan bina ilə yanaşı digər məhəllələrdə də 10-dan çox tikili, o cümlədən kəndlərdə məscidlər dağılıb.

Səhiyyə naziri Kemal Memişoğlu zəlzələdən təsirlənən dörd nəfərin xəstəxanaya yerləşdirildiyini, onların həyatlarının təhlükədə olmadığını açıqlayıb.

Zəlzələ Balıkesir başda olmaqla İstanbul, İzmir, Kütahya, Yalova, Manisa, Uşak, Aydın, Eskişehir, Sakarya və Tekirdağda da hiss olunub. Prezident Rəcəb Tayyib Ərdoğan hadisədən dərhal sonra bütün aidiyyəti qurumların fəaliyyətə başladığını və prosesi şəxsən izlədiyini bəyan edib.

Son günlərdə Sındırqı rayonunda 3,5 baldan yuxarı bir neçə yeraltı təkanın qeydə alındığı bildirilir.