14–15 avqust 2025-ci il tarixlərində Qazaxıstanın Şımkent şəhərində yerləşən “Rixos Khadisha Shymkent” otelində II Qazaxıstan Ateroskleroz Cəmiyyəti Qurultayı keçirilib.

Azmedinfo.az xəbər verir ki, tədbir həm onlayn, həm də oflayn formatda baş tutaraq ateroskleroz və digər ürək-damar xəstəliklərinin profilaktikası, diaqnostikası və müalicəsi sahəsində ən son elmi yeniliklərin müzakirəsi üçün geniş platforma yaradıb.

Qurultayda Qazaxıstan, Azərbaycan və digər ölkələrdən kardioloqlar, terapevtlər, lipidoloqlar, ümumi praktika həkimləri, tibb bacıları və digər səhiyyə mütəxəssisləri iştirak edirlər.

Azərbaycanı tədbirdə Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova, institutun elmi katibi, tibb üzrə fəlsəfə doktoru Təranə Cavadova və Hipertenziya şöbəsinin müdiri, professor Tofiq Cahangirov təmsil ediblər. Onların çıxışları aterosklerozun risk faktorları, müasir müalicə metodları və yüksək qan təzyiqinin ürək-damar sağlamlığına təsiri mövzularına həsr olunub. Professor Gülnaz Dadaşova həmçinin tədbirin moderatoru qismində çıxış edib.

İki gün davam edən qurultay çərçivəsində plenar iclaslar, tematik seksiyalar və interaktiv ustad dərsləri təşkil olunub. Proqramda ateroskleroz və qaraciyər xəstəlikləri, iltihab prosesləri, ailəvi hiperkolesterinemiya, hipertrigliseridemiya, periferik ateroskleroz, eləcə də Qazaxıstanda dislipoproteinemiya üzrə aparılan tədqiqatların nəticələri təqdim edilib.

Tədbir beynəlxalq əməkdaşlığın gücləndirilməsi, ortaq tədqiqat layihələrinin icrası və innovativ müalicə protokollarının tətbiqi istiqamətində mühüm razılaşmalarla yadda qalıb. Qurultayın sonunda ən fəal iştirakçılar xüsusi mükafatlarla təltif olunublar.