Səhiyyə Nazirliyi vətəndaşlardan daxil olan şikayətlər əsasında estetik xidmət göstərən bəzi mərkəzlərin fəaliyyətini araşdırıb. Nazirliyin məlumatına görə, araşdırmalar zamanı vətəndaşların sağlamlığına təhlükə yarada biləcək faktlar aşkarlanıb və müvafiq qanunvericiliyə uyğun olaraq plandankənar yoxlamalar həyata keçirilib.

Azmedinfo.az xəbər verir ki, sosial şəbəkələrdə yayılan videogörüntülərdə adı hallanan Abdullayeva Gülbədə Əlqismət qızının Səhiyyə Nazirliyinin Tibb işçilərinin vahid reyestrində adı yoxdur və onun tibbi fəaliyyət göstərmək səlahiyyəti mövcud deyil.

Şikayətlərdə əməliyyatların "Dost Estetik Mərkəzi"ndə keçirildiyi, digər məlumatlarda isə həmin şəxsin “UĞUR Estetik Mərkəzi 777”də çalışdığı göstərilib. Araşdırmalar nəticəsində məlum olub ki, hər iki müəssisə rəsmi tibb müəssisəsi deyil və tibbi fəaliyyət göstərmək üçün lisenziyaları yoxdur.

“Dost Estetik Mərkəzi”nin adı nə Analitik Ekspertiza Mərkəzinin özəl tibb müəssisələrinin bazasında, nə də Dövlət Vergi Xidmətinin uçot bazasında mövcuddur.

Bununla yanaşı, sahibkar Xəyalə Aydın qızı İsmayılovaya məxsus “UĞUR Estetik Mərkəzi 777”də lisenziyasız tibbi fəaliyyət həyata keçirildiyi aşkar olunub. Yoxlama zamanı kosmetoloji xidmətlərin göstərildiyi, tibbi avadanlıqlarla təchiz olunmuş otaqlarda pasiyent qəbulu və prosedurların icrası faktı müəyyən edilib.

Nazirlik bildirir ki, 2023–2025-ci illərdə bu müəssisədə dəfələrlə plandankənar yoxlamalar aparılıb və ümumilikdə 5 inzibati protokol tərtib olunaraq “İnzibati Xətalar Məcəlləsi”nin 210.1-ci maddəsinə əsasən cərimələr tətbiq edilib.

Lisenziyasız fəaliyyətin davam etməsi səbəbindən, Səhiyyə Nazirliyi hüquq-mühafizə orqanlarına müraciət edərək “UĞUR Estetik Mərkəzi 777”nin qanunsuz fəaliyyəti ilə bağlı əlavə araşdırma aparılmasını xahiş edib.