Səhiyyə Nazirliyi Elmi-Tədqiqat Kardiologiya İnstitutunda fəaliyyət göstərən “ETKİ könüllüləri” qrupunun üzvlərinə sertifikatların təqdim olunması mərasimi keçirilib.

Azmedinfo.az xəbər verir ki, tədbirdə çıxış edən ETKİ-nin direktoru, professor Gülnaz Dadaşova könüllü fəaliyyətini gənclər üçün əvəzsiz fürsət kimi dəyərləndirərək, onun institutda formalaşmasına xüsusi önəm verdiyini bildirib. O qeyd edib ki, bu təşəbbüs sayəsində yüzlərlə gənc tibbi biliklərini genişləndirib, peşə bacarıqlarını təkmilləşdirib və gələcək karyeraları üçün vacib təcrübə qazanıb.

Professor Gülnaz Dadaşova könüllülərin təcrübə müddətində göstərdikləri fəallığı yüksək qiymətləndirib, onların institutun müxtəlif layihələrində yaxından iştirakını təqdir etdiyini vurğulayıb. O, həmçinin gənclərin bu təşəbbüsdə iştirakına hər zaman dəstək verəcəyini qeyd edərək, onlara gələcək fəaliyyətlərində uğurlar arzulayıb.

Tədbirin sonunda “ETKİ könüllüləri” qrupunun üzvlərinə sertifikatlar təqdim olunub.