Avqustun 27-də AMEA-nın Mərkəzi Elmi Kitabxanasında Elm və Təhsil Nazirliyinin Abdulla Qarayev adına Fiziologiya İnstitutu və Türkiyənin İKSAD təşkilatçılığı ilə hibrid formatda “8-ci Beynəlxalq Tibb və Sağlamlıq Elmləri Konqresi” işinə başlayıb.

Azmedinfo.az xəbər verir ki, tədbir Vətən müharibəsində qələbənin 5-ci ildönümünə həsr olunub, əsas mövzu isə təbii faktorların tibbi praktikada istifadəsidir.

Konqresdə Türkiyə, Pakistan, Qazaxıstan, Çin, Hindistan, İran və digər ölkələrdən 200-dən çox nümayəndə iştirak edir. Açılışda AMEA prezidenti, akademik İsa Həbibbəyli bildirib ki, belə tədbirlər iqlimə, yaşıl dünyaya və sağlamlığa göstərilən diqqətin elmi təzahürüdür. O, Naftalan nefti, müalicəvi bitkilər, mineral sular və Duzdağ kimi təbii resursların tibbdə istifadəsinin prioritet olduğunu vurğulayıb.

Konqresdə həmçinin Elm və Ali Təhsil üzrə Dövlət Agentliyi, İKSAD, İnönü Universiteti, Pekin Universiteti və digər qurumların nümayəndələri çıxış ediblər. Fiziologiya İnstitutunun direktoru professor Ulduz Həşimova qeyd edib ki, Azərbaycanın zəngin müalicəvi bitki resursları daha dərindən öyrənilməli, onların hüceyrə səviyyəsində təsirləri araşdırılmalıdır.

Elmi-praktik konqres 20 bölmə iclasında davam edir. Xərçəngin erkən diaqnostikası, neyrodegenerativ xəstəliklər, ictimai səhiyyə modelləri, süni intellektin tibbdə tətbiqi kimi mövzular geniş müzakirə olunub. Tədbirə avqustun 29-da yekun vurulacaq.