29 avqust – 1 sentyabr tarixlərində İspaniyanın paytaxtı Madriddə, IFEMA Madrid Konqres Mərkəzində Avropa Kardiologiya Cəmiyyətinin (ESC) illik konqresi baş tutdu. Bu il tədbir Ümumdünya Kardiologiya Konqresi ilə birgə təşkil olundu və mühüm kardioloji toplantı kimi yadda qaldı.

Azmedinfo.az xəbər verir ki, konqresdə dünyanın müxtəlif ölkələrindən aparıcı alimlər, professorlar və klinisistlər iştirak edərək ürək-damar xəstəliklərinin profilaktikası, diaqnostikası və müalicəsi sahəsində ən son elmi yenilikləri müzakirə etdilər.

Azərbaycanı bu möhtəşəm toplantıda Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşova rəsmi nümayəndə heyəti ilə birlikdə təmsil etdi. ETKİ nümayəndə heyətinin iştirakı Azərbaycan kardiologiyasının beynəlxalq elmi mərkəzlərlə əməkdaşlığının genişlənməsi, yeni klinik təcrübələrin öyrənilməsi və onların ölkəmizin səhiyyə sisteminə tətbiqi baxımından mühüm əhəmiyyət daşıdı.

Konqresin əsas mövzusu “Sərhədsiz Kardiologiya” oldu. Tədbirdə qlobal sağlamlıq problemləri, səhiyyədə bərabərsizliklər, müasir müalicə metodlarının tətbiqi və onların müxtəlif səhiyyə sistemlərinə uyğunlaşdırılması yolları müzakirə edildi.