Azərbaycan Tibb Universitetində (ATU) ED 2.27 Dissertasiya Şurasının 3118.01 – “Kardiologiya” ixtisası üzrə Elmi Seminarın növbəti iclası keçirilib. Tədbir Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşovanın sədrliyi ilə baş tutub.

Azmedinfo.az xəbər verir ki, seminarda təqdim olunan dissertasiya işi t.ü.f.d. Qalib İmanov tərəfindən hazırlanaraq Dissertasiya Şurasına təqdim edilib. Tədqiqat “İşemik etiologiyalı ürək çatışmazlığı xəstələrində miokardın revaskulyarizasiyasının xəstəliyin proqnozuna təsiri” mövzusuna həsr olunub.

Qalib İmanovun işi, kardioloji praktikanın ən aktual problemlərindən birinə – işemik ürək çatışmazlığı olan pasiyentlərdə revaskulyarizasiya əməliyyatının uzunmüddətli nəticələrinə işıq salır. Dissertasiya xəstəliyin gedişatına, sağ qalma göstəricilərinə və müalicə strategiyalarının effektivliyinə dair elmi əsaslı nəticələr ortaya qoyur.

Seminar iştirakçıları mövzunun həm nəzəri, həm də praktik əhəmiyyətini vurğulayıblar. Qeyd olunub ki, təqdim olunan araşdırma kardiologiya sahəsində klinik qərarların təkmilləşdirilməsinə və pasiyentlərin həyat keyfiyyətinin artırılmasına töhfə verə bilər.

İclasın sonunda dissertasiya işi ətrafında müzakirələr aparılıb, suallar cavablandırılıb və bir sıra elmi təkliflər səsləndirilib.

Qeyd edilib ki, ATU-nun Dissertasiya Şurası belə tədbirlərin Azərbaycan kardiologiyasının inkişafı, gənc alimlərin elmi fəaliyyətinin dəstəklənməsi və beynəlxalq səviyyədə tanınan tədqiqatların ortaya çıxması üçün mühüm platformadır.