Azərbaycan Respublikası Səhiyyə Nazirliyi ilə Özəl Tibb Müəssisələri Assosiasiyasının (ÖTMA) təşəbbüsü ilə sentyabrın 10-da “Qanunsuz tibbi fəaliyyətə qarşı mübarizə: hüquqi əsaslar və ictimai məsuliyyət” mövzusunda ictimai müzakirə təşkil olunub.

Azmedinfo.az xəbər verir ki, tədbirdə Səhiyyə Nazirliyi və Milli Məclisin Səhiyyə Komitəsinin nümayəndələri, Baş Prokurorluq, İcbari Tibbi Sığorta üzrə Dövlət Agentliyi (İTSDA), TƏBİB, həmçinin qeyri-hökumət təşkilatlarının təmsilçiləri iştirak ediblər.

Müzakirələrin əsas məqsədi qanunsuz tibbi xidmətlərin qarşısını almaq, hüquqi bazanı təkmilləşdirmək, dövlət-özəl əməkdaşlığını gücləndirmək və ictimai etimadı artırmaq olub.

ÖTMA İdarə Heyətinin sədri Günel Əliyeva çıxışında qeyd edib ki, pasiyentlərin sağlamlığını təhlükəyə atan qanunsuz fəaliyyətlə mübarizə yalnız dövlət qurumlarının deyil, bütün tibb ictimaiyyətinin birgə məsuliyyətidir. O, həkimlərin, özəl klinikaların və pasiyentlərin hüquq və vəzifələrini bilməsinin vacibliyini vurğulayıb.

Səhiyyə Nazirliyinin Aparat rəhbəri Tural Babayev isə mövzunun aktuallığını önə çəkərək bildirib ki, qanunsuz tibbi fəaliyyətlə mübarizə dörd istiqamətdə aparılır: qanunvericilik, nəzarət, dövlət qurumları arasında koordinasiya və ictimai iştirakçılıq. O, nəzarət mexanizmlərinin gücləndirilməsinin, rəqəmsal texnologiyaların tətbiqinin və maarifləndirmə tədbirlərinin bu sahədə mühüm rol oynadığını diqqətə çatdırıb.

Daha sonra Milli Məclisin Səhiyyə Komitəsinin üzvü Pərvanə Vəliyeva, Səhiyyə Nazirliyinin Səhiyyə siyasəti şöbəsinin müdiri Ramik Quliyev və digər çıxışçılar qanunsuz fəaliyyətin qarşısını almağın yolları, pasiyentlərin məlumatlandırılması və maarifləndirmə kampaniyalarının əhəmiyyəti barədə fikirlərini bölüşüblər.

Müzakirələr sual-cavab formatında davam etdirilib.