Şəki şəhərində “Alyans” klinikasında “Erkən müayinə – sağlam gələcəyin açarıdır!” adlı səyyar tibbi aksiya keçirilib.

Azmedinfo.az xəbər verir ki, tədbir “PAŞA Holdinq” və Azərbaycan Respublikası Səhiyyə Nazirliyinin dəstəyi ilə təşkil olunub. Aksiyanın əsas məqsədi erkən diaqnostikanın vacibliyinə diqqət çəkmək, əhalinin sağlamlıq biliklərini artırmaq və tibbi xidmətlərə əlçatanlığı təmin etmək olub.

Saat 10:00-dan 18:00-dək davam edən tədbir Şəki və ətraf rayon sakinlərinin böyük marağına səbəb olub. İştirakçılar ödənişsiz olaraq qanda şəkər və təzyiqin yoxlanılması, ilkin laborator analizlər, terapevt və endokrinoloq müayinəsi, pediatrik xidmətlər, USM müayinəsi, ginekoloji baxış, travmatoloji və oftalmoloji xidmətlərdən yararlanıblar.

Həkimlər insanlara fərdi məsləhətlər verib, lazım gəldikdə müvafiq ixtisaslaşmış sahələrə yönləndiriblər. Risk qrupuna daxil olan şəxslər müəyyən olunub və onlara xüsusi tövsiyələr təqdim edilib. Qanda şəkər səviyyəsində pozuntu aşkar edilən vətəndaşlara gündəlik nəzarəti asanlaşdırmaq məqsədilə qlükometr cihazları paylanıb.

Bu addım uzunmüddətli fəsadların qarşısının alınmasına və sağlam həyat tərzinin təşviqinə yönəlib. Azyaşlı uşaqlara rəngləmə kitabçaları və rəngli qələmlər təqdim olunub.