Hər il tibbi yardım göstərilməsi zamanı təhlükəsizlik qaydalarına əməl olunmaması nəticəsində dünyada milyonlarla pasiyent zərər görür. Təəssüf ki, bu problem xüsusilə aşağı və orta gəlirli ölkələrdə daha kəskin hal alır və hər il 2,6 milyon insanın həyatına son qoyur. Bu rəqəmlər tibbi xidmətdə təhlükəsizliyin nə qədər həyati əhəmiyyət daşıdığını bir daha göstərir.

Azmedinfo.az xəbər verir, tibbi xidmətin məqsədi insanlara şəfa vermək, onların sağlamlığını bərpa etməkdir. Lakin bəzən texniki səhvlər, diaqnoz yanlışlıqları, dərman dozalarının səhv təyin edilməsi və ya sanitar-gigiyenik normaların pozulması nəticəsində pasiyentlər gözlənilməz zərərlərlə qarşılaşırlar. Belə hadisələr təkcə fiziki deyil, həm də psixoloji zərbələrə səbəb olur, pasiyentlərin səhiyyə sisteminə olan etimadını sarsıdır.

Bu qlobal problemin ciddiliyinə diqqət çəkmək və pasiyentlərin sağlamlığının qorunmasını bəşəri prioritetə çevirmək məqsədilə Ümumdünya Səhiyyə Təşkilatı (ÜST) 2019-cu ilin may ayında, Dünya Səhiyyə Assambleyasının 72-ci sessiyasında "Dünya Pasiyentlərin Təhlükəsizliyi Günü" təsis edib. Bu gün, tibb işçilərindən tutmuş, siyasətçilərə qədər hər kəsi pasiyent təhlükəsizliyi mədəniyyətini yaratmağa və inkişaf etdirməyə çağırır. Bu, sadəcə tibbi protokollara əməl etmək deyil, həm də hər bir tibb işçisinin vicdanla və məsuliyyətlə çalışmasını təmin edən bir sistem qurmaq deməkdir.

Bu günün əsas hədəfləri arasında tibbi xidmətlərin təhlükəsizliyini artırmaq, tibb müəssisələrində pasiyent yönümlü mühit yaratmaq və tibb işçilərinin peşəkarlığını yüksəltmək yer alır. Pasiyentlər, onların ailələri və səhiyyə işçiləri arasında maarifləndirmə tədbirləri keçirilərək, tibbi xidmətlər zamanı risklərin necə azaldıla biləcəyi barədə məlumatlar verilir. Beləliklə, bu gün hər kəsi sağlamlığın qorunmasına dair ortaq məsuliyyətə çağıran bir platforma rolunu oynayır.

Bakı Baş Səhiyyə Mərkəzi