Azərbaycanda qadınların təhsil, səhiyyə, məşğulluq və qərar qəbuletmədə iştirakının gücləndirilməsi üçün ardıcıl islahatlar aparılıb.

Azmedinfo.az xəbər verir ki, bu fikirləri Ailə, Qadın və Uşaq Problemləri üzrə Dövlət Komitəsinin sədri Bahar Muradova, Qadınlara dair Dördüncü Dünya Konfransının otuzuncu ildönümünə həsr olunmuş BMT Baş Assambleyasının Yüksək Səviyyəli İclasında çıxışı zamanı səsləndirib.

O qeyd edib ki, gender bərabərliyi və qadınların, qızların səlahiyyətlərinin artırılması istiqamətində qəbul olunmuş Pekin Bəyannaməsi və Fəaliyyət Platforması uzun illərdir beynəlxalq səylərə istiqamət verir. Lakin yeni çağırışlar bu sənədlərin yenilənməsini, lazımi resurslarla təmin olunmasını və icrasının sürətləndirilməsini tələb edir.

Bahar Muradova bildirib ki, Azərbaycanda qadın əməyinin qadağan olunduğu sahələrin sayı minimuma endirilib, ödənişli atalıq məzuniyyəti nəzərdə tutan qanun layihəsi hazırlanıb. Bununla yanaşı, məişət zorakılığı, uşaq evlilikləri və qohum nikahlarını tənzimləyən qanunvericilik təkmilləşdirilib, nikah yaşı ilə bağlı istisnalar ləğv edilib. “Məişət zorakılığı ilə mübarizəyə dair Milli Fəaliyyət Planı” uğurla icra olunub və hazırda yeni plan üzərində iş aparılır. Bundan başqa, gender bərabərliyinə dair milli fəaliyyət planının hazırlanması da davam etdirilir.

Komitə sədri vurğulayıb ki, işğaldan azad olunmuş ərazilərdə qurulan müasir infrastruktur, “ağıllı” şəhər və kəndlər, rəqəmsal xidmətlər və inkubasiya proqramları bütün vətəndaşlara bərabər imkanlar yaradır.

Bahar Muradova əlavə edib ki, Azərbaycan qlobal təşəbbüslərə də mühüm töhfələr verir. Cari ilin iyulunda ölkədə ilk dəfə İqtisadi Əməkdaşlıq Təşkilatının Qadınlar Forumu keçirilib. Həmçinin Azərbaycan, Asiyada Qarşılıqlı Fəaliyyət və Etimad Tədbirləri üzrə Müşavirə çərçivəsində Qadınlar Şurasının yaradılması təşəbbüsünü irəli sürüb. Artıq üzv dövlətlər tərəfindən dəstəklənən bu orqan qadınların təhsil, əmək bazarı, iqlim və sülh quruculuğu, habelə qadın hüquqları və gender bərabərliyi sahəsində əməkdaşlığı və dialoqu təşviq edəcək.