İcbari Tibbi Sığorta üzrə Dövlət Agentliyinin İdarə Heyətinin sədri Zaur Əliyev Bakıda keçirilən I Azərbaycan Beynəlxalq İnvestisiya Forumu çərçivəsində (AIIF 2025) "Sea Breeze Sağlamlıq Vadisi: Azərbaycanın tibbi mükəmməlliyə qlobal qapısı" adlı panel sessiyasında çıxış edib.

Azmedinfo.az xəbər verir ki, İcbari tibbi sığorta ilə özəl tibb müəssisələrində tibbi xidmətlərin göstərilməsi haqqında danışan Z.Əliyev, "İcbari tibbi sığorta dövlət xəstəxanalarında mövcud olmayan xidmətlərə çıxış imkanı yaradır. Rəsmi göndəriş əsasında vətəndaşlar müqaviləli özəl müəssisələrdə müalicə ala bilirlər. Bu, vətəndaşlara maliyyə yükü olmadan keyfiyyətli xidmətlərdən yararlanmaq imkanı verir", - deyib.

"İcbari tibbi sığorta Sea Breeze tibbi klasterində göstərilən xidmətlərə pasiyentlərin çıxışını necə dəstəkləyə bilər?" sualına cavabında İdarə Heyətinin sədri qeyd edib ki, sığorta müqavilələri qiymətlərin tənzimlənməsi, akkreditasiya və hesabatlılıq üzrə tələblər qoya bilər. "Bu isə özəl müəssisələrdə istifadə olunan xidmətlərin beynəlxalq standartlara uyğunluğunu və maliyyə şəffaflığını təmin edir. İcbari tibbi sığorta selektiv, amma güclü bir mexanizmə çevrilir: dövlət tibb müəssisələrinin imkanlarının məhdud olduğu hallarda pasiyentlərin tibbi xidmətlərə çıxışını qoruyur", - deyə Z.Əliyev əlavə edib.

Qeyd edək ki, AIIF 2025 Prezident İlham Əliyevin himayəsi altında təşkil olunub.