TƏBİB rəhbəri: Sağlamlıq Vadisi dövlət və özəl sektorun güclərini birləşdirəcək

24 Sentyabr 2025

360

TƏBİB rəhbəri: Sağlamlıq Vadisi dövlət və özəl sektorun güclərini birləşdirəcək

Bakıda Prezident İlham Əliyevin himayəsi altında 1-ci Azərbaycan Beynəlxalq İnvestisiya Forumu (1st Azerbaijan International Investment Forum – “AIIF 2025”) keçirilir. Forum çərçivəsində baş tutan "Sea Breeze Sağlamlıq Vadisi: Azərbaycanın tibbi mükəmməlliyə qlobal qapısı" adlı panel sessiyada çıxış edib.

Azmedinfo.az xəbər verir ki, TƏBİB-in İcraçı direktoru Vüqar Qurbanov bildirib ki, “Sea Breeze Sağlamlıq Vadisi” vahid ekosistemdə profilaktik, ilkin, ixtisaslaşmış və reabilitasiya xidmətlərini birləşdirən inteqrasiya olunmuş pilot zona kimi çıxış edə bilər: ““Sea Breeze Sağlamlıq Vadisi” biznesyönümlü idarəetmə təcrübəsi sayəsində sağlamlıq turizmini kapitallaşdıraraq, eyni zamanda turist cəlb etməklə uğurlu nəticələrlə dünya bazarına açıla bilər”.

Ölkə səhiyyəsində baş verən yeniliklər və gələcək hədəflər barədə məlumat verən V.Qurbanov bildirib ki, bu Vadi gələcəkdə özəl sektorun çevikliyilə dövlətin institusional gücünü birləşdirməklə resursların optimal istifadəsi modellərini inkişaf etdirə bilər: “Sağlamlıq Vadisi müxtəlif xidmətlərin – ixtisaslı tibbi yardım, reabilitasiya xidmətlərinin və tibbi turizmin vahid modeldə təqdim edildiyi bir məkandır. Burada tətbiq olunan yanaşmalar kiçik miqyasda sınanaraq qiymətləndirilə bilər. Əgər nəticələr uğurlu olarsa, həmin modellərin seçilmiş elementləri dövlət müəssisələrinə uyğunlaşdırılaraq mərhələli şəkildə tətbiq edilə bilər”.

“Sea Breeze Sağlamlıq Vadisi”nin dövlət xəstəxanalarının tərəfdaşı kimi çıxış edə biləcəyini də qeyd edən V.Qurbanov onu da vurğulayıb ki, Sea Breeze-də yaşayan sakinlərin birbaşa icbari tibbi sığortadan istifadə etməsi nəzərdə tutula bilər: “Bu, Sabunçu, Xəzər və Suraxanı rayonlarının əhalisi üçün də əlavə imkan yaradaraq, həm xidmətlərə çıxışı asanlaşdıracaq, həm də dövlət xəstəxanalarının üzərindəki yükü azaldacaq. Bundan əlavə, Respublika Təcili və Təxirəsalınmaz Tibbi Yardım Mərkəzi ilə əməkdaşlıq nəticəsində həm yerli sakinlər, həm də xarici qonaqlar üçün təcili yardım xidməti operativ şəkildə təşkil edilə bilər”.

TƏBİB