Tədqiqatçılar xəbərdarlıq ediblər ki, həyati vacib preparatların tədarükündəki fasilələr səhiyyə üçün sistemli təhlükəyə çevrilir.

Azmedinfo.az "The Lancet Public Health" jurnalında dərc olunmuş yeni araşdırmaya istinadən yazır ki, beynəlxalq komanda 2010–2024-cü illər arasında Avropanın 18 ölkəsi və ABŞ-da 600 milyondan çox xəstənin müalicəsinə dair məlumatları təhlil edərək göstərib ki, dərman qıtlığı terapiyanın əlçatanlığını və müalicə sxemlərinin özünü dəyişir.

Alimlər müəyyən ediblər ki, səkkiz preparatdan istifadənin həcmi tədarükdə fasilələrlə bağlı xəbərlərdən sonra üçdə birindən çox azalıb. Ən çox zərər çəkənlər arasında geniş istifadə olunan dərmanlar – antibiotik amoksisillin və siqareti tərgitməyə kömək edən vareniklin olub.

Bəzi hallarda isə göstərişlərdə və dozalarda dəyişikliklər müşahidə edilib: məsələn, revmatoid artrit zamanı sarilumabin təyin olunması azalıb, doza endirilib və müalicənin müddəti qısaldılıb.