25–27 sentyabr tarixlərində Şəki şəhərində ilk dəfə “Şəki Sağlamlıq Günləri” təşkil olunub. Tədbir Azərbaycan Respublikasının Səhiyyə Nazirliyi Elmi-Tədqiqat Kardiologiya İnstitutunun (ETKİ) təşkilatçılığı, İcbari Tibbi Sığorta üzrə Dövlət Agentliyi və TƏBİB-in dəstəyi ilə reallaşdırılıb.

Azmedinfo.az xəbər verir ki, üç gün davam edən proqram çərçivəsində mühüm tədbirlər həyata keçirilib.

İlk gün şəhid və qazilərin ailə üzvləri üçün ödənişsiz tibbi müayinələr aparılıb.

Növbəti gün Heydər Əliyev Mərkəzində Səhiyyə Nazirliyi tərəfindən 9 DTT balı ilə qiymətləndirilən “Ürək müdaxilələrinə gətirən yol: göstərişlər və qərar mexanizmləri” mövzusunda elmi konfrans öz işinə başlayıb. Konfransda Şəki Rayon İcra Hakimiyyətinin, Şəki rayon Mərkəzi Xəstəxanasının və digər dövlət qurumlarının rəhbərləri, həmçinin ölkənin aparıcı kardioloqları və beynəlxalq ekspertlər iştirak ediblər. Çıxışçılar ürək-damar xəstəliklərinin diaqnostika və müalicəsində müasir yanaşmaları təqdim ediblər.

Açılış mərasimində çıxış edən ETKİ-nin direktoru, professor Gülnaz Dadaşova vurğulayıb ki, ilk dəfə keçirilən bu sağlamlıq günlərinin əsas məqsədi region əhalisinə daha yaxın olmaq, tibbi xidmətlərin əlçatanlığını artırmaq və son elmi nailiyyətləri birbaşa həkimlər və vətəndaşlarla bölüşməkdir.

Səhiyyə Nazirliyinin Səhiyyə Siyasəti Şöbəsinin müdiri Ramik Quliyev çıxışında bildirib ki, regionlarda bu cür təşəbbüslər dövlətin səhiyyə siyasətinin mühüm istiqamətidir. Məqsəd sağlam həyat tərzini təşviq etmək, profilaktik tədbirləri gücləndirmək və hər bir vətəndaşın keyfiyyətli tibbi yardıma çıxışını təmin etməkdir.

İcbari Tibbi Sığorta üzrə Dövlət Agentliyinin Tibbi Planlama Departamentinin rəhbəri, professor Hikmət İbrahimli isə qeyd edib ki, Sağlamlıq Günləri sadəcə tibbi tədbir deyil, həm də dövlətin vətəndaş qarşısında məsuliyyətinin göstəricisidir.

Sonuncu gün – 27 sentyabrda Anım Günü münasibətilə “Şəhidlər xiyabanı” ziyarət olunub, şəhidlərin xatirəsi ehtiramla yad edilib.

“Şəki Sağlamlıq Günləri” təkcə Şəki şəhərini deyil, həm də Qax, Balakən, Zaqatala, Qəbələ, Oğuz, Mingəçevir və Ağdaş rayonlarını əhatə edərək regionlarda sağlam həyat tərzinin təşviqi və tibbi maarifləndirmənin gücləndirilməsi baxımından mühüm əhəmiyyət kəsb edir.