TƏBİB-in dəstəyilə keçirilən konfransda minimal invaziv cərrahiyyənin perspektivləri müzakirə olundu

29 Sentyabr 2025

200

Sumqayıt şəhərində TƏBİB-in dəstəyi, Azərbaycan Minimal İnvaziv Cərrahlar Cəmiyyəti, Almazakademi Tibbi Treyninq Mərkəzi və Sumqayıt Tibb Mərkəzinin təşkilatçılığı ilə “Azərbaycanda minimal invaziv cərrahiyyənin bu günü” mövzusunda 8-ci regional konfrans keçirilib.

Azmedinfo.az xəbər veir ki, tədbir şəhidlərimizin əziz xatirəsinin bir dəqiqəlik sükutla yad olunması və Dövlət Himninin səsləndirilməsi ilə başlanıb.

Tədbirdə iştirak edən TƏBİB-in İcraçı direktorunun müavini Araz Nəsirov işğaldan azad edilmiş ərazilərdə həyata keçirilən genişmiqyaslı bərpa və quruculuq işlərindən danışıb. O beynəlxalq təşkilatların Qarabağa səfərləri barədə məlumat verərək, qonaqların ən çox Azərbaycanın inkişaf tempinə - “sürət”inə diqqət etdiyini qeyd edib:“Bu gün müasir Azərbaycanı ifadə edən ən doğru söz məhz sürətdir. Təhsil, iqtisadiyyat, səhiyyə və digər sahələrdə aparılan islahatlar məhz bu sürətə əsaslanır. Onun daha da artması üçün beynəlxalq əməkdaşlıq, xaricdəki həkimlərimizlə sıx əlaqələr və bilik mübadiləsi xüsusi əhəmiyyət kəsb edir”.

Azərbaycan Minimal İnvaziv Cərrahlar Cəmiyyətinin bariatrik cərrahiyyə bölməsinin rəhbəri, tibb üzrə fəlsəfə doktoru Fərid Rəfiyev çıxışında konfransın önəmindən bəhs edib və bu cür görüşlərin ölkə səhiyyəsinə töhfə verdiyini xüsusi vurğulayıb.

Sumqayıt Tibb Mərkəzinin direktoru Elnur Azadxanov rəhbərlik etdiyi müəssisənin fəaliyyət istiqamətləri, həyata keçirilən əməliyyatlar və səhiyyə xidmətlərinin genişləndirilməsi barədə məlumat verib. O, belə elmi-praktik tədbirlərin region səhiyyəsinin inkişafında əhəmiyyətli rol oynadığını qeyd edib. Daha sonra konfransın elmi hissəsi başlayıb.

M.Topçubaşov adına Elmi-Cərrahiyyə Mərkəzinin Yoğun və düz bağırsaq cərrahiyyəsi şöbəsinin rəhbəri, tibb elmləri doktoru, professor, Azərbaycan Minimal İnvaziv Cərrahlar Cəmiyyətinin prezidenti Qurbanxan Müslümov, habelə İslam Mahalov, tibb üzrə fəlsəfə doktorları Fərid Rəfiyev, Zaur Xəlilov, Nicat Alışov və Natiq Mirzəyev müxtəlif mövzularda təqdimatlarla çıxış ediblər.

Onların təqdimatlarında minimal invaziv cərrahiyyənin aktual məsələləri, müasir yanaşmalar və beynəlxalq təcrübənin tətbiqi ilə bağlı nümunələr iştirakçılarla bölüşülüb.
Panel müzakirələri zamanı isə cərrahiyyənin inkişaf perspektivləri, yeni texnologiyaların tətbiqi və region üzrə tibbi kadrların təkmilləşdirilməsi istiqamətində fikir mübadiləsi aparılıb.

Sonda tədbir iştirakçılarının sualları cavablandırılıb və interaktiv müzakirələr keçirilib.

TƏBİB