Azərbaycan Respublikası Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin təşkilatçılığı ilə Mərkəzi Gömrük Hospitalında “Cərrahiyyədə transfuziya təlimatları” mövzusunda elmi-praktik seminar keçirilib.

Azmedinfo.az xəbər verir ki, tədbirin məqsədi cərrahi əməliyyatlarda qan və qan komponentlərinin istifadəsi, müasir transfuzioloji yanaşmalar, təhlükəsizlik qaydaları və klinik protokollar barədə iştirakçılara nəzəri və praktik biliklərin çatdırılması olub.

Seminarda Mərkəzi Gömrük Hospitalının anestezioloq-reanimatoloqu Rəşad Nəsirli mövzu ilə bağlı geniş təqdimatla çıxış edib. O, transfuziya zamanı tətbiq olunan əsas prinsiplər, donor qanının təhlükəsiz istifadəsi, mümkün ağırlaşmaların qarşısının alınması və kliniki hallardan nümunələr barədə rezidentlərə ətraflı məlumat verib.

Təlim çərçivəsində iştirakçılar həmçinin transfuziya prosesində multidissiplinar yanaşmanın əhəmiyyəti, yeni təlimatların tətbiqi və beynəlxalq təcrübədən doğan tövsiyələrlə tanış olublar.

Seminarın sonunda rezidentlərin çoxsaylı sualları cavablandırılıb, praktiki məsələlərlə bağlı fikir mübadiləsi aparılıb və gələcəkdə bu sahədə maarifləndirici tədbirlərin davam etdirilməsinin vacibliyi vurğulanıb.