Dünya miqyasında ən nüfuzlu kardioloji tədbirlərdən biri hesab edilən "Great Wall International Congress of Cardiology" (GW-ICC 2025) çərçivəsində keçirilən AHS sessiyası – “Heart Failure and Cardiomyopathy” mövzusunda Azərbaycan alimlərinin çıxışı böyük maraqla qarşılanıb.

Azmedinfo.az xəbər verir ki, sessiyanın elmi müzakirə hissəsində Akad. C.M.Abdullayev ad. ET Kardiologiya İnstitutunun direktoru, professor Gülnaz Dadaşova “Innovative Approaches in Heart Failure Management: from Precision Medicine to Digital Health” adlı məruzə ilə çıxış edib. O, təqdimatında sübutlara əsaslanan müasir yanaşmalardan, süni intellekt və rəqəmsal monitorinq texnologiyalarının ürək çatışmazlığının erkən aşkarlanması və fərdiləşdirilmiş müalicəsində tətbiq imkanlarından bəhs edib. Professorun çıxışı elmi əsaslı yanaşması və aktual məzmunu ilə iştirakçılar tərəfindən yüksək qiymətləndirilib.

Eyni sessiyanın elmi rəylər bölməsində (Discussant) İnstitutun böyük elmi işçisi, ürək cərrahı, t.ü.f.d. Vüsal Hacıyev təqdim olunan elmi tədqiqatlara dair rəy və təkliflərini bölüşüb.

Konqres çərçivəsində Hindistan, Çin və digər ölkələrin aparıcı kardioloqları da çıxış ediblər. Azərbaycan nümayəndələrinin iştirakı beynəlxalq həmkarlar tərəfindən yüksək dəyərləndirilib, gələcək elmi əməkdaşlıq istiqamətləri üzrə fikir mübadiləsi aparılıb.

Tədbirdə Azərbaycan Respublikasının Səhiyyə Nazirliyinin Elmi-Tədqiqat Kardiologiya İnstitutu ilə Tsinghua Universitetinin Birinci Xəstəxanasının Ürək Mərkəzi arasında elmi-tədqiqat və akademik əməkdaşlığa dair memorandumun imzalanması da nəzərdə tutulub.

Bu sənədin məqsədi kardiologiya sahəsində birgə elmi layihələrin həyata keçirilməsi, müasir texnologiyaların tətbiqi, habelə mütəxəssislərin təlim və təcrübə mübadiləsini genişləndirməkdir.

Bu əməkdaşlıq Azərbaycan kardiologiya elminin beynəlxalq səviyyədə tanıdılmasına, eləcə də ürək-damar xəstəliklərinin müasir müalicə və tədqiqat istiqamətlərində ölkəmizin mövqeyinin möhkəmlənməsinə mühüm töhfə verəcək.