Ağciyər xəstəliklərinin erkən diaqnostikası və profilaktikası mövzusunda Naxçıvanda treninqlər təşkil olunub

20 Oktyabr 2025

590

Səhiyyə Nazirliyi Elmi-Tədqiqat Ağciyər Xəstəlikləri İnstitutunun və nazirliyin Professor Gindes adına Respublika Uşaq və Yeniyetmələr üçün Vərəm və Tənəffüs Orqanlarının Xəstəlikləri Sanatoriyasının rəhbər heyəti Naxçıvan Muxtar Respublikasına işgüzar səfər edib.

Azmedinfo.az xəbər verir ki, səfər proqramı çərçivəsində nümayəndə heyəti tərəfindən Ailə Sağlamlıq Mərkəzlərində və Naxçıvan Muxtar Respublikası Ağciyər Xəstəlikləri Dispanserində fəaliyyət göstərən həkim və tibb işçiləri üçün maarifləndirici treninqlər keçirilib.

Naxçıvan Muxtar Respublikası Ağciyər Xəstəlikləri Dispanserində keçirilən Treninqdə Səhiyyə Nazirliyi Elmi-Tədqiqat Ağciyər Xəstəlikləri İnstitutun direktoru t.ü.f.d İradə Axundovanın, İnstitutun Milli istinad laboratoriyasının şöbə müdiri Mehriban Seyfətdinova və İnstitutun həkim-ftiziatrı Aysel Aslanovanın mövzuyla bağlı çıxışları dinlənilib.

Treninqdə tənəffüs sistemi xəstəliklərinin profilaktikası, erkən diaqnostikası və müalicəsi sahəsində əməkdaşlığın gücləndirilməsi, elmi-tədqiqat istiqamətləri üzrə qarşılıqlı təcrübə mübadiləsi, eləcə də kadr potensialının artırılması məsələlərindən danışılıb.

Tədbirdə həmçinin Ailə sağlamlıq mərkəzlərinin direktorları, tibb işçiləri və digər səhiyyə mütəxəssisləri də iştirak etmiş, təlimin əhəmiyyəti və gələcəkdə bu cür tədbirlərin davam etdirilməsinin vacibliyi vurğulanıb.

Belə təlimlərin keçirilməsi tibbi personalın peşəkar inkişafına, elmi biliklərin təcrübədə tətbiqinə və əhalinin sağlamlığının qorunması istiqamətində xidmətlərin keyfiyyətinin yüksəldilməsinə mühüm töhfə verir.

Təlimin sonunda iştirak edən həkimlərə sertifikatlar təqdim olunub.