Yeni Klinikada tibbi təcrübə - ATU tələbələri klinik bacarıqlarını təkmilləşdirdilər

21 Oktyabr 2025

360

Yeni Klinikanın Təcili və Təxirəsalınmaz Tibbi Yardım şöbəsində Azərbaycan Tibb Universitetinin Azərbaycanlı və xarici tələbələrdən ibarət növbəti qrupu “Təcili Tibb” intern proqramı çərçivəsində iki həftəlik klinik tədris mərhələsini uğurla başa vurmuşlar.

Azmedinfo.az xəbər verir ki, təcrübənin əsas məqsədi tələbələrin müasir tibbi mühitdə real klinik iş prinsiplərini mənimsəməsi, peşə hazırlıqlarının artırılması və gələcək fəaliyyətlərinə daha inamla başlamalarına şərait yaratmaq olmuşdur.

Dr. Fəxriyyə Quliyeva və Dr.Arzu Əliyevanın kuratorluğu ilə həyata keçirilən təcrübə müddətində tələbələr xəstələrin ilkin tibbi qiymətləndirilməsini aparmış, kliniki bacarıqlarını təkmilləşdirmiş və təcili yardım şəraitində qərarvermə prosesinə aktiv şəkildə cəlb olunmuşlar.

Bundan əlavə, iştirakçılar klinikada istifadə olunan müasir tibbi avadanlıqlarla — monitorinq cihazları, EKQ, infuziya sistemləri, defibrilyator, qan qazı analizatoru, USM cihazında eFAST protokolunun icrası və s. — yaxından tanış olaraq onların tətbiqi üzrə praktik vərdişlər əldə etmişlər.