Azərbaycanın Pediatrlar Assosiasiyasının alimləri və sahə mütəxəssisləri uşaqların sağlam inkişafına yönəlmiş innovativ maarifləndirmə resurslarının hazırlanmasında fəal iştirak edirlər.

Azmedinfo.az xəbər verir ki, onlar Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi tərəfindən təqdim olunan “Sağlam uşaq” portalı və mobil tətbiqi üçün verilən materialların elmi əsaslara söykənməsini, məlumatların dəqiqliyini və praktik əhəmiyyətini təmin ediblər.

Assosiasiyanın üzvləri olan pediatriya, uşaq psixologiyası və ictimai səhiyyə sahəsində böyük təcrübəyə malik mütəxəssislər bu resursun məzmununun hər bir yaş qrupuna uyğunlaşdırılmasında, eləcə də valideyn və müəllimlər üçün faydalı tövsiyələrin formalaşdırılmasında əhəmiyyətli rol oynayır. Onların bilik və peşəkarlıqları nəticəsində “Sağlam uşaq” platforması etibarlı, elmi cəhətdən əsaslandırılmış və cəmiyyətin geniş təbəqələri üçün əlçatan bir maarifləndirmə vasitəsinə çevrilib.

Bu portal və mobil tətbiq məktəbyaşlı uşaqlar, valideynlər, müəllimlər, eləcə də müxtəlif sahələr üzrə mütəxəssislər üçün nəzərdə tutulub. Portalda sağlam qidalanma, fiziki aktivlik, gigiyena, psixi sağlamlıq, zərərli vərdişlərdən qorunma və xəstəliklərin risk amilləri kimi mövzularda 600-dən çox məqalə, 200 maarifləndirici material, 131 videoçarx, 30-dan çox infoqrafika və interaktiv oyunlar təqdim olunur.