Yeni Klinikada İPİN üzrə beynəlxalq standartlara uyğun yeni yanaşmalar müzakirə edildi

23 Oktyabr 2025

556

Yeni Klinikada İPİN üzrə beynəlxalq standartlara uyğun yeni yanaşmalar müzakirə edildi

TƏBİB-in dəstəyi və Azərbaycan Təlim və İnkişaf Mərkəzinin təşkilatçılığı ilə Yeni Klinikada “İnfeksiyaya nəzarətdə yeni dövr — Texnologiya və Komanda İşi” adlı tədbir baş tutub.

Azmedinfo.az xəbər verir ki, tədbirdə TƏBİB-in Tibbi xidmətlərin inkişafı departamentinin rəhbəri Yaqut Qarayeva, Yoluxucu xəstəliklər və infeksion nəzarətin təşkili şöbəsinin müdiri Nilufər Məmmədova, TƏBİB tabeli tibb müəssisələrinin İPİN üzrə məsul şəxsləri və bir sıra mütəxəssislər iştirak edib.

Açılış nitqi ilə çıxış edən Y.Qarayeva tibb müəssisələrində İPİN-in əhəmiyyətindən bəhs edərək, bu istiqamətdə görülən işlərin pasiyent və tibbi personalın təhlükəsizliyinin təmin olunmasında, səhiyyə xidmətlərinin keyfiyyətinin artırılmasında və infeksion risklərin minimuma endirilməsində mühüm rol oynadığını vurğulayıb. O, həmçinin İPİN sisteminin davamlı təkmilləşdirilməsinin, tibbi personalın bilik və bacarıqlarının artırılmasının, eləcə də beynəlxalq standartlara uyğun nəzarət mexanizmlərinin tətbiqinin vacibliyini diqqətə çatdırıb.

Təqdimatlar zamanı İPİN sahəsində beynəlxalq və yerli təcrübələr bölüşülüb, komanda ruhunun gücü ön plana çıxarılıb, səhiyyə sahəsində innovasiyalar və rəqəmsal texnologiyaların rolundan danışılıb.

Daha sonra Azərbaycan Təlim və İnkişaf Mərkəzinin direktoru Əziz Fətullayev TƏBİB-lə imzalanmış əməkdaşlıq memorandumu sayəsində tibb işçilərinin yerli və beynəlxalq təlim proqramlarından faydalanacağını bildirib.

Tədbirin sonunda geniş müzakirələr aparılıb, gələcəkdə də tibb müəssisələrində İPİN sisteminin tətbiqi və nəzarəti istiqamətində bilik və təcrübə mübadiləsinə dayanan təlimlərin, elmi-praktiki tədbirlərin davam etdiriləcəyi bildirilib.

Qeyd edək ki, hər il oktyabr ayının üçüncü həftəsi Beynəlxalq İPİN həftəsi olaraq qeyd edilir.
#İPİNhəftəsi