Azərbaycan Respublikası Səhiyyə Nazirliyinin Elmi-Tədqiqat Kardiologiya İnstitutu ilə Azərbaycan Milli Elmlər Akademiyasının Genetik Ehtiyatlar İnstitutu arasında qarşılıqlı əməkdaşlığa dair Anlaşma Memorandumu imzalanıb.

Azmedinfo.az xəbər verir ki, sənədi Səhiyyə Nazirliyinin Elmi-Tədqiqat Kardiologiya İnstitutunun direktoru professor Gülnaz Dadaşova və AMEA Genetik Ehtiyatlar İnstitutunun direktoru, akademik Zeynal Əkpərov imzalayıblar.

Memorandumun əsas məqsədi kardiologiya sahəsində regenerativ tibbin inkişafı, xüsusilə ürək-damar xəstəliklərinin müalicəsində kök hüceyrə texnologiyalarının tətbiqi istiqamətində birgə elmi-tədqiqatların aparılmasıdır. Sənəd həmçinin klinik və laborator səviyyədə müştərək layihələrin reallaşdırılmasını, eləcə də bu sahədə ixtisaslı kadrların hazırlanmasını nəzərdə tutur.

Tərəflər razılaşıblar ki, gələcəkdə birgə elmi konfranslar və seminarlar təşkil edəcək, müasir müalicə üsullarının tətbiqi, elmi nəşrlərin hazırlanması və innovativ texnologiyaların praktik istifadəsi sahəsində əməkdaşlığı genişləndirəcəklər.

İmzalanma mərasimində çıxış edən prof. Gülnaz Dadaşova vurğulayıb ki, bu əməkdaşlıq ürək-damar xəstəliklərinin müalicəsində yeni imkanlar açacaq və pasiyentlər üçün daha effektiv tibbi xidmətlərin təmininə mühüm töhfə verəcək.

Akademik Zeynal Əkpərov isə qeyd edib ki, kök hüceyrə texnologiyalarının kardiologiya ilə inteqrasiyası, Azərbaycan elminin və səhiyyəsinin inkişafında strateji əhəmiyyət daşıyan addım olacaq.