Naxçıvan Muxtar Respublikası Səhiyyə Nazirliyinin dəstəyi, TƏBİB-in təşkilatçılığı ilə “Şəkərli Diabet və Tiroid Xəstəliklərinin İdarə Olunmasında Yeniliklər” mövzusunda elmi-praktik seminar keçirilib.

Tədbirdə Naxçıvan Muxtar Respublikası Səhiyyə Nazirliyinin nümayəndələri, Respublika Endokrinologiya Mərkəzinin əməkdaşları, eləcə də endokrinologiya sahəsində fəaliyyət göstərən həkim və tibb heyəti iştirak edib.

Azmedinfo.az xəbər verir ki, seminarda əvvəlcə Naxçıvan Muxtar Respublikası Səhiyyə Nazirliyinin Aparatının rəhbəri Xavər Babayeva açılış nitqi ilə çıxış edib. O, bu kimi tədbirlərin bilik və təcrübə mübadiləsi baxımından mühüm əhəmiyyət daşıdığını vurğulayıb, həmçinin bildirib ki, belə seminarlar regionlarda səhiyyə xidmətlərinin keyfiyyətinin artırılmasına və müasir tibbi yanaşmaların tətbiqinə mühüm töhfə verir.

Daha sonra Respublika Endokrinologiya Mərkəzinin direktor vəzifəsini müvəqqəti icra edən Kəmalə Ağayeva çıxış edərək son illərdə şəkərli diabet və tiroid xəstəliklərinin idarə olunması sahəsində əldə olunan yeniliklər, elmi nailiyyətlər və onların praktik tibbə tətbiqi barədə məlumat verib.

Seminarın elmi hissəsində “Qalxanabənzər vəzin funksional testlərinin dəyərləndirilməsi”, “Yod əskikliyi ilə bağlı xəstəliklər və Azərbaycandakı vəziyyət”, “Hipertireoz zamanı müasir yanaşma metodları” və digər mövzularda məruzələr dinlənilib.

Tədbirin sonunda iştirakçıların sualları cavablandırılıb və seminar iştirakçılarına sertifikatlar təqdim olunub.