Bu gün bütün dünyada psoriaz xəstəliyinə diqqəti artırmaq, ictimai maarifləndirməni gücləndirmək və xəstəlikdən əziyyət çəkən insanlara dəstək olmaq məqsədilə qeyd olunur. Psoriaz xroniki, residivləşən, immun sisteminin fəaliyyət pozğunluğu nəticəsində yaranan dəri xəstəliyidir və adətən dəri səthində quru, qızarmış, qaşınan, pulcuqlu səpkilərlə özünü göstərir.

Azmedinfo.az xəbər verir ki, Ümumdünya Psoriaz Günü ilk dəfə 2004-cü ildə Beynəlxalq Psoriaz Assosiasiyaları Federasiyası (IFPA) tərəfindən təsis edilib. Hər il bu gün müxtəlif şüarlar altında keçirilməklə həm pasiyentlərə psixoloji və sosial dəstək göstərilir, həm də cəmiyyətin bu xəstəliyə qarşı yanlış stereotipləri aradan qaldırmaq məqsədi daşıyır.

Mütəxəssislər vurğulayırlar ki, psoriaz yalnız dəri problemi deyil, həm də bədənin digər orqanlarına təsir göstərə bilən sistemli xəstəlikdir. Müasir dövrdə erkən diaqnostika, düzgün müalicə və həyat tərzi dəyişiklikləri xəstəliyin gedişini yüngülləşdirməyə və xəstələrin həyat keyfiyyətini əhəmiyyətli dərəcədə yaxşılaşdırmağa imkan verir.

Xəstəliyin yaranma səbəbi dəqiq məlum deyil. Psoriazın simptomları həkim tərəfindən yazılmış dərmanlar vasitəsi ilə idarə olunur.