Belarus Respublikasının səhiyyə nazirinin müavini Aleksandr Starovoytov və Azərbaycan Respublikasının səhiyyə nazirinin müavini Nadir Zeynalov nazirliyin Ə.Əliyev adına Azərbaycan Dövlət Həkimləri Təkmilləşdirmə İnstitutunu ziyarət ediblər.

Azmedinfo.az Nazirliyin məlumatına istinadən xəbər verir ki, qonaqlar Azərbaycanın tanınmış siyasi və dövlət xadimi professor Əziz Əliyevin xatirə muzeyində olan fotoşəkillər və eksponatlarla tanış olublar.

İnstitutun rektoru Nazim Pənahov qurumun tarixi haqqında məlumat verərək təmsil etdiyi təhsil müəssisəsində hazırda müasir tələblərə cavab verən şəraitin yaradılması, tədrisdə müasir İT texnologiyaların tətbiqi, tədris prosesinə yüksək ixtisaslı əcnəbi mütəxəssislərin cəlb edilməsi istiqamətində həyata keçirilən tədbirlər barədə məlumat verib. Qeyd edilib ki, son illərdə ölkələrimiz arasında bir çox sahələrdə əlaqələr genişləndirilir. Bildirilib ki, İnstitula Belarus Dövlət Tibb Universiteti arasında akademik, elmi və təhsil əməkdaşlığının inkişafı, həmçinin qarşılıqlı anlaşmanın gücləndirilməsi məqsədilə Akademik Əməkdaşlıq haqqında Razılaşmanın olması bunun sübutudur.

Görüş zamanı Azərbaycanda və Belarus Respublikasında diplomdan sonrakı tibb təhsilinin mövcud tendensiyaları və problemləri də müzakirə olunub, gələcək əməkdaşlığın istiqamətləri və qarşılıqlı maraq doğuran məsələlər ətrafında fikir mübadiləsi aparılıb.

Görüşün sonunda səmimi qəbula görə minnətdarlığını bildirən Belarusun səhiyyə nazirinin müavini bu cür görüşlərin təcrübə və bilik mübadiləsi baxımından çox vacib olduğunu vurğulayıb.