14 noyabr – Ümumdünya Diabet Günüdür - azmedinfo.az - Azərbaycan Tibbi İnformasiya və Səhiyyə Portalı

14 noyabr – Ümumdünya Diabet Günüdür

14 Noyabr 2025

502

Ümumdünya Diabet Gününün keçirilməsi ilə bağlı təklif Beynəlxalq Diabet Federasiyası və Ümumdünya Səhiyyə Təşkilatı tərəfindən dünyada diabet hallarının yüksəlməsinin qarşısını almaq məqsədilə 1991-ci ildə irəli sürülüb. O vaxtdan etibarən hər il 14 noyabr Ümumdünya Diabet Günü kimi qeyd olunur.

Azmedinfo.az hər kəsə qandakı şəkəri nəzarətdə saxlamaq üçün müntəzəm tibbi müayinələri, balanslı qidalanmanı və gündəlik fiziki aktivliyi həyatınızın ayrılmaz hissəsinə çevirməyi tövsiyə edir.

Bu tarix 160-dan çox ölkədə, Beynəlxalq Diabet Federasiyasının 200 üzvü, o cümlədən assosiasiya və təşkilatlar, səhiyyə mütəxəssisləri, şəkər xəstələri və onların ailələri tərəfindən qeyd olunur. Kampaniya ictimaiyyəti xəstəliyin səbəbləri, simptomları, fəsadları və müalicəsi ilə məlumatlandırmaq məqsədini daşıyır.

Ümumdünya Diabet Günündə diabetlə bağlı qlobal məlumatlılıq artırılır, bu xəstəliyin inkişafının qarşısının alınması yolları araşdırılır.

Sağlam qidalanma, fiziki aktivlik, zərərli vərdişlərdən uzaq olmaq və psixi sağlamlığı qorumaqla şəkərli diabet xəstəliyinin risk faktorunu azaltmaq olar.

Səhiyyə Nazirliyi İctimai Səhiyyə və İslahatlar Mərkəzi tərəfindən bu istiqamətdə müntəzəm olaraq maarifləndirmə tədbirləri həyata keçirilir, məlumatlandırıcı materiallar nəşr edilərək əhaliyə paylanılır, video-çarxlar hazırlanır.