Kardiologiya və lipidologiya sahəsində aparıcı mütəxəssislərin iştirakı ilə “Ateroskleroz və Dislipidemiyanın İdarəolunması: Çağdaş Yanaşmalar və Perspektivlər” Ekspertlər Forumu keçirildi. Forum Azərbaycanda Lipid Məktəblərinin yaradılması təşəbbüsünün ilk rəsmi iclası olmaqla xüsusi əhəmiyyət kəsb etdi.

Azmedinfo.az xəbər verir ki, tədbir Səhiyyə Nazirliyi Elmi-Tədqiqat Kardiologiya İnstitutunun (ETKİ) direktoru, professor Gülnaz Dadaşovanın açılış nitqi ilə başladı. Professor çıxışında lipidologiya sahəsində yeni mərhələnin başlandığını vurğulayıb: "Lipid Məktəblərinin açılması ölkədə erkən diaqnostika, həkim təlimi və əhali maarifləndirilməsi sahəsində dönüş nöqtəsi olacaq.”

Açılış nitqindən sonra Forumun əsas qonağı Avropa lipidologiyasının aparıcı simalarından biri, professor Alberico L. Katapano (İtaliya) çıxış edib. Alim dünya miqyasında tanınmış tədqiqatçı, Avropa Ateroskleroz Cəmiyyətinin keçmiş prezidenti, EAS/ESC dislipidemiya üzrə klinik təlimatlarının həmmüəllifi, lipid metabolizmi, ateroskleroz patogenezi, PCSK9 inhibitorları və lipoprotein(a) üzrə aparıcı araşdırmaların müəllifi kimi tanınır. Onun elmi nüfuzu və beynəlxalq təcrübəsi Lipid Məktəblərinin yaradılması prosesinə xüsusi strateji dəyər qatır. Professorun rəhbərlik etdiyi yanaşmalar Avropada lipid idarəetməsinin qızıl standart sayılır və bu biliklərin Azərbaycanda tətbiqi milli kardiovaskulyar risklərin idarə edilməsində yeni mərhələnin əsasını qoyur.

1-ci Plenar Müzakirə çərçivəsində ETKİ-nin elmi katibi, t.ü.f.d. Təranə Cavadova ölkədə lipid xidmətinin təşkili və Milli Lipid Xəritəsi Təşəbbüsü barədə geniş təqdimatla çıxış edib.

Daha sonra həkim-kardioloq, t.ü.f.d. Ruslan Nəcəfov, prof. Valeh Mirzəzadə, Dr. Gülşən Süleymanova və Dr. Fuad Səmədovun aterosklerotik ürək-damar xəstəliklərinin qlobal yükü, şəkərli diabet və dislipidemiya ilə bağlı müasir multiborbidlik yanaşmaları, aterosklerozun qeyri-invaziv görüntülənməsində innovativ həllər, lipid metabolizminə genetik yanaşmalar və fərdiləşdirilmiş tibbin imkanları mövzularında məruzələri dinlənilib.

Dialoq bölməsində PCSK9 inhibitorları, siRNA texnologiyası, lipoprotein(a) və digər müasir müalicə hədəfləri üzrə interaktiv müzakirələr aparılıb. Forum təkcə elmi fikir mübadiləsi deyil, həm də Azərbaycanda Lipid Məktəblərinin fəaliyyətinə rəsmi başlanğıcı elan edən ilk tədbir kimi qiymətləndirilib. İrəli sürülən təşəbbüslər kardiovaskulyar risklərin azaldılması, lipid pozğunluqlarının erkən aşkarlanması və həkimlərin müasir biliklərlə təchiz olunması istiqamətində yeni imkanlar yaradıb.