TƏBİB və “Uğur Sağlık Teknolojileri Azərbaycan” arasında Anlaşma Memorandumu imzalanıb

23 Noyabr 2025

440

TƏBİB və “Uğur Sağlık Teknolojileri Azərbaycan” arasında Anlaşma Memorandumu imzalanıb

TƏBİB və “Uğur Sağlık Teknolojileri Azərbaycan” MMC arasında ikitərəfli və qarşılıqlı faydalı əməkdaşlığın qurulması məqsədilə görüş keçirilib.

Azmedinfo.az xəbər vereir ki, görüş çərçivəsində tərəflər arasında qarşılıqlı əməkdaşlıq haqqında Anlaşma Memorandumu imzalanıb.

Memorandum sağlamlıq texnologiyaları sahəsində uzunmüddətli, qarşılıqlı faydalı və effektiv əməkdaşlığın qurulmasını nəzərdə tutur. Əməkdaşlıq sahələrinə süni intellekt əsaslı reanimasiya və radiologiya layihələri, sağlamlıq simulyasiyası və təlim mərkəzi, virtual reallıq əsaslı təcili tibbi yardım təlimləri, ailə sağlamlıq mərkəzlərinin idarə olunması və telesağlamlıq layihələri daxildir.

Görüşdə TƏBİB-in İcraçı direktorunun müavini Anar İsrafilov, struktur bölmə rəhbərləri, “Uğur Sağlık Teknolojileri Azərbaycan”ın direktoru Yurdanur Murzoğlu və idarə heyətinin üzvləri iştirak ediblər. Tərəflər əməkdaşlığın həyata keçirilməsi üçün mütəmadi məsləhətləşmələr aparmaq və birgə layihələri təşkiletmək barədə razılığa gəliblər.

Memorandum tərəflərin sağlamlıq texnologiyaları sahəsində əməkdaşlığını möhkəmləndirir, qarşılıqlı öhdəliklərin icrasını tənzimləyir və birgə layihələrin effektiv və qarşılıqlı razılıq prinsipləri əsasında həyata keçirilməsini təmin edir.

Sözügedən əməkdaşlığın Azərbaycanın səhiyyə texnologiyalarının inkişafına və innovativ təcrübələrin tətbiqinə töhfə verməsi nəzərdə tutulub.