TƏBİB-in nümayəndə heyəti Qazaxıstanda keçirilən tibbi turizm sərgisində

28 Noyabr 2025

312

TƏBİB-in nümayəndə heyəti Qazaxıstanın paytaxtı Astana şəhərində təşkil olunan “GlobalMedKZ” - Qlobal Sağlamlıq, İnnovasiya və Tibbi Turizm Sərgisi və Konqresində iştirak edib.

Azmedinfo.az xəbər verir ki, tədbirin əsas məqsədi regionda tibbi turizmin inkişafı, səhiyyə sahəsində innovasiyaların təşviqi və ölkələrarası əməkdaşlığın gücləndirilməsidir.

Sərgidə müxtəlif ölkələrin səhiyyə qurumları, klinikaları, tibbi turizm təşkilatları və beynəlxalq tərəfdaşlar iştirak ediblər.

Tədbirdə TƏBİB-in Strateji inkişaf departamentinin Korporativ əməkdaşlıq şöbəsinin müdiri Nigar Rüstəmli və şöbənin baş məsləhətçisi Aysel Məhərrəmova Azərbaycanın tibbi turizm potensialının Qazaxıstan bazarında tanıdılması, səhiyyə sahəsində qarşılıqlı əməkdaşlıq mexanizmlərinin müzakirəsi və iki ölkə arasında tibbi xidmətlərin təşkili üzrə əlaqələrin genişləndirilməsi istiqamətində bir sıra görüşlər keçiriblər.

Görüşlərin əsas məqsədi Qazaxıstandan Azərbaycana tibbi turist axınının artırılması, tibbi agentliklər və tibb müəssisələri ilə əməkdaşlığın genişləndirilməsi, həmçinin iki ölkə arasında sağlamlıq xidmətlərinin mübadiləsinin gücləndirilməsi olub.

Tədbir çərçivəsində, həmçinin Qafqazın ən böyük tibb müəssisəsi olan Yeni Klinikanın imkanları, müasir tibbi xidmətləri, eləcə də yeni yaradılan Yeni Robotik Reabilitasiya və Sümük İliyi Transplantasiyası mərkəzlərinin fəaliyyəti barədə məlumatlar təqdim edilib.

Görüşlər zamanı tibbi turizmin inkişafı, pasiyentyönümlü xidmətlərin təşkili, həkimlərarası peşəkar əlaqələrin gücləndirilməsi və gələcək birgə layihələr üzrə əməkdaşlıq imkanları nəzərdən keçirilib.

Sərgi çərçivəsində nümayəndə heyəti Azərbaycanın Qazaxıstandakı səfiri cənab Ağalar Atamoğlanov ilə görüşüb.

Görüş zamanı səfirlik tərəfindən iki ölkə arasında tibbi turizmin inkişafına dəstək göstərilməsi, Qazaxıstan klinikaları və şirkətləri ilə əməkdaşlıq əlaqələrinin qurulması, eləcə də gələcək birgə təşviqat fəaliyyətlərinin həyata keçirilməsi istiqamətində imkanlar müzakirə olunub.