Tibbi Ərazi Bölmələrini İdarəetmə Birliyinin (TƏBİB) verdiyi məlumata görə, hazırda Azərbaycanın müxtəlif bölgələrində bir sıra ixtisaslar üzrə tibbi personal, xüsusilə də həkim çatışmazlığı müşahidə olunur. Bu çatışmazlıq hər bölgədə fərqli ixtisasları əhatə edir.

Azmedinfo.az xəbər verir ki, məlumata görə, şimal regionları anestezioloq-reanimatoloq, ginekoloq, travmatoloq, radioloq, neyrocərrah, nevroloq, infeksionist, otorinolarinqoloq, nefroloq və ailə həkimi kimi mütəxəssislərə ehtiyac duyur. Cənub regionlarında isə anestezioloq-reanimatoloq, endokrinoloq, kardioloq, nefroloq, neonatoloq, travmatoloq, radioloq, infeksionist, pediatriya, nevroloq və ailə həkimi ixtisaslarında boşluqlar qeydə alınıb.

Bundan əlavə, qərb regionlarında cərrahiyyə, nefroloq, qastroenteroloq, travmatoloq, reanimatoloq, dermatoveneroloq və ailə həkimi, şərq regionlarında ginekoloq, reanimatoloq, neonatoloq, oftalmoloq, cərrahiyyə və ailə həkimi ixtisasları əsas çatışmazlıq sahələridir. Mərkəzi Aran regionlarında isə anestezioloq-reanimatoloq, radioloq, oftalmoloq, nefroloq, travmatoloq, cərrahiyyə, kardioloq, terapiya, pediatriya və neonatoloq sahələri üzrə həkim çatışmazlığı mövcuddur.

TƏBİB bildirir ki, bölgələrdəki bu kadr ehtiyacının aradan qaldırılması üçün daimi işlər həyata keçirilir. Nazirlər Kabinetinin müvafiq qərarına uyğun olaraq, işə qəbul prosesi tamamilə rəqəmsallaşdırılıb. Qurumun tabeliyindəki tibb müəssisələrində olan bütün vakant iş yerləri elektron portal üzərindən namizədlərə şəffaf şəkildə təqdim edilir və beləliklə, onların mövcud vakansiyalara müraciət etmək hüququ təmin olunur.

Qeyd olunur ki, hazırda TƏBİB-in tabeliyində 91 publik hüquqi şəxs və 2701 tibb müəssisəsi fəaliyyət göstərir. Bu müəssisələrdə ümumilikdə 93 min 64 işçi, o cümlədən 16 min 923 həkim çalışır. Həmin heyətin 8 faizi xaricdə təhsil almış mütəxəssislərdir.