Yeni Klinikada Antimikrob Rezistentliyə (AMR) Qarşı Maarifləndirmə Həftəsi çərçivəsində təlim keçirilib

03 Dekabr 2025

538

Yeni Klinikada Antimikrob Rezistentliyə (AMR) Qarşı Maarifləndirmə Həftəsi çərçivəsində təlim keçirilib

18–24 noyabr Antimikrob Rezistentliyə (AMR) Qarşı Maarifləndirmə Həftəsi çərçivəsində Yeni Klinikada üçgünlük maarifləndirici təlim proqramı təşkil edilib.

Azmedinfo.az xəbər verir ki, infeksiyaya nəzarət bölməsinin müdiri Mədinə Abdullayevanın rəhbərliyi ilə həyata keçirilən təlimdə həkim-rezidentlər və tibb bacıları iştirak ediblər.

Proqram çərçivəsində iştirakçılara AMR-in mahiyyəti, yaranma səbəbləri, yayılma mexanizmləri və bu problemin qlobal miqyasda yaratdığı təhlükələr barədə geniş məlumat verilib. Təlimdə antimikrob rezistentliyin sürətlə inkişaf edən, mövcud müalicə vasitələrinin effektivliyini azaldan və ictimai sağlamlıq üçün ciddi təhlükə yaradan qlobal problem olduğu vurğulanıb.

Antimikrob dərmanların yanlış istifadəsi, infeksiyaların qeyri-effektiv müalicəsi və nəzarətsiz dərman qəbulu AMR-in yayılmasını sürətləndirən əsas faktorlar kimi qeyd edilib. Həmçinin bildirilib ki, təbii fəlakətlər, münaqişələr və müharibələr kimi qlobal proseslər infeksiyaların yayılma dinamikasına təsir etməklə AMR-in inkişaf tempini daha da artırır.

Təlim zamanı AMR-in yalnız səhiyyəyə deyil, həm də qida təhlükəsizliyinə ciddi təsir göstərdiyi diqqətə çatdırılıb. Antimikrobial rezistentlik ərzaq zəncirinə sirayət edərək heyvan, bitki və insan sağlamlığına təsir edir, bu isə kənd təsərrüfatında iqtisadi itkilərə səbəb olur.

Sonda mövzu ətrafında fikir mübadiləsi aparılıb və iştirakçıların sualları cavablandırılıb.

Qeyd edək ki, AMR-in dünya üzrə artan təhlükə olması səbəbindən ÜST hər il 18–24 noyabr tarixlərini Antimikrob Rezistentliyə Qarşı (AMR) Maarifləndirmə Həftəsi kimi qeyd edir və ölkələri bu istiqamətdə maarifləndirmə tədbirlərinə dəstək verməyə çağırır.