“İnfeksiyaya nəzarət: standart və xüsusi ehtiyat tədbirləri” mövzusunda maarifləndirici təlim keçirilib

04 Dekabr 2025

418

“İnfeksiyaya nəzarət: standart və xüsusi ehtiyat tədbirləri” mövzusunda maarifləndirici təlim keçirilib

3 dekabr 2025-ci il tarixində Dövlət Gömrük Komitəsinin Tibb Xidməti İdarəsinin Elmi-Təcrübi və Tədris Mərkəzinin təşkilatçılığı ilə Mərkəzi Gömrük Hospitalında infeksiyaların qarşısının alınması və effektiv nəzarət mexanizmlərinin təkmilləşdirilməsi məqsədilə tibb bacıları üçün növbəti maarifləndirici təlim keçirilib.

Azmedinfo.az xəbər verir ki, təlimdə Hospitalın həkim-infeksionisti Mədinə Abdullayeva “İnfeksiyaya nəzarət: standart və xüsusi ehtiyat tədbirləri” mövzusunda təqdimatla çıxış edib.

Mərkəzi Gömrük Hospitalının tibb bacılarının iştirak etdiyi təlimdə Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev salamlama nitqi ilə çıxış edərək təkmilləşdirici təlimlərin əhəmiyyətindən bəhs edib.

Daha sonra təlimdə Mədinə Abdullayeva infeksiyaların ötürülmə yolları, tibbi personalın gündəlik fəaliyyətində riayət etməli olduğu standart ehtiyat tədbirləri, həmçinin yüksək riskli klinik situasiyalarda xüsusi ehtiyat tədbirlərinin tətbiqi ilə bağlı ətraflı məlumat verib, xəstəxanadaxili infeksiyaların azaldılmasında əl gigiyenasının, şəxsi qoruyucu vasitələrin düzgün seçilməsi və istifadəsinin, sterilizasiya və dezinfeksiya qaydalarına əməl olunmasının vacibliyini vurğulayıb.

Təlim interaktiv müzakirələr, praktiki nümunələr və sual-cavab sessiyası ilə davam edib. İştirakçılar gündəlik iş prosesində qarşılaşdıqları real hallar üzrə suallar ünvanlayaraq mütəxəssis rəyini dinləyiblər.