Orqan ianəsi 12 yaşlı oğlanın gözlərinə işıq bəxş etdi

18 Dekabr 2025

976

Orqan ianəsi 12 yaşlı oğlanın gözlərinə işıq bəxş etdi

Kornea donorluğu görmə qabiliyyətini itirmiş insan üçün dünyanı yenidən görmək, rəngləri və işığı tanımaq deməkdir. Kornea- buynuz qişa yalnız dünyasını dəyişmiş şəxslərdən köçürülür. Mərhəmət, humanizm dünya işığından məhrum olan insana, həsrətində olduğu işığı bəxş edə bilər.

Azmedinfo.az-a verilən məlumata göprə, kornea donorluğu 12 yaşlı Göyçay sakini İslamzadə Röyalın dünyasını işıqlandırıb. Hələ 1 yaşında olanda anadangəlmə görmə problemi səbəbindən onun heç görmədiyi bəlli olub.

Sonradan bir neçə dəfə əməliyyat olunsa da, görmə qabiliyyəti yalnız qısa müddət bərpa edilib. Yenidən görmə qabiliyyətini itirən uşağı müayinə edən həkimlər bildiriblər ki, artıq adi əməliyyatlar kömək edə bilməz və yeganə çıxış yolu buynuz qişa transplantasiyasıdır.

Ailə Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzinə müraciət edib. Röyal gözləmə siyahısına daxil edilib. Günlərin birində isə çoxdan gözlənilən zəng gəlib: “Dünyasını dəyişmiş şəxsin ailəsi buynuz qişa bağışlayıb. Gözləmə siyahısında sizin növbəniz çatıb, müayinələr üçün gələ bilərsiniz".

Ailə dərhal Bakıya yola düşüb. Bütün müayinələr aparıldıqdan sonra Zərifə Əliyeva adına Göz Xəstəlikləri Elmi-Tədqiqat İnstitutunda buynuz qişa transplantasiyası əməliyyatı uğurla həyata keçirilib. Dörd gün sonra xəstəxananın yeməkxanasında stulların rənginin fərqinə varan Röyal həyəcanla deyib: “Stulların rənglərini görürəm. Biri narıncıdır, biri göy..."

Bu sözlər valideynlərə çoxdan həsrətində olduqları sevinci yaşadıb. Röyalın özünün xoşbəxtliyini də sözlə ifadə etmək çətindir. O, indi hərfləri öyrənir, hər gün dünyanı bir az da yaxından tanıyır, yeni bir detal kəşf etməyin sevincini yaşayır. Bir vaxtlar yalnız səsindən tanıdığı əşyalar indi onun üçün rəngə, formaya, mənaya çevrilir. Ən önəmlisi isə, Röyal artıq heç kimin köməyi olmadan sərbəst yeriyir, əşyaları özü tapır, toxunur, baxır, seçir.

"Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzinə, Zərifə Əliyeva adına Göz Xəstəlikləri Elmi- Tədqiqat İnstitutuna təşəkkürümüz sonsuzdur. Həkimlərimizlə fəxr edirik"- deyən ailə Röyalın dünyasını işıqlandıran Azərbaycan səhiyyəsinə minnətdarlığını ifadə edir. Onlar donor ailəsinin xeyirxahlığını heç vaxt unutmayacaqlarını, orqan ianəsi sayəsində dünya işığına həsrət Röyalın həyata bağlandığını və həyatı sevməyi öyrəndiyini bildirirlər.

Başqa insanların dünyasını işıqlandırmaq insanın ölümdən sonra da edə biləcəyi ən böyük xeyirxahlıqdır. Ölümdən sonra donor olmaqla bir- birimizə həyat, ümid və işıq bəxş edə bilərik.