Qarabağ Universitetində ailə həkimlərinin yetişdirilməsi və ilkin səhiyyə xidmətləri müzakirə olunub

24 Dekabr 2025

348

Qarabağ Universitetinin Tibb və sağlamlıq elmləri fakültəsində “Səhiyyə müdafiəçiliyi praktikada: rollar, bacarıqlar və Azərbaycanın immunizasiya kontekstindən real nümunələr” mövzusunda panel müzakirə keçirilib.

Azmedinfo.az xəbər verir ki, Tibb və tibb bacısı (qardaşı) işi ixtisasları üzrə təhsil alan tələbələrin əhalinin sağlamlığının qorunması, immunizasiya xidmətlərinin təşkili, sahə səviyyəsində mövcud çağırışlar, eləcə də səhiyyə siyasəti ilə praktiki icra arasındakı əlaqələr barədə məlumatlandırılması məqsədi ilə təşkil olunan sessiyada İcbari Tibbi Sığorta üzrə Dövlət Agentliyi və TƏBİB-in ilkin tibbi-sanitariya yardımının təkmilləşdirilməsi ilə bağlı layihəsi haqqında da məlumat verilib.

Panel müzakirədə TƏBİB-in İlkin səhiyyə xidməti departamentinin rəhbəri Rəşad Çobanlı spiker qismində çıxış edərək səhiyyə müdafiəçiliyinin müasir səhiyyə sistemlərində rolu, ilkin tibbi-sanitariya yardımının əhəmiyyəti və immunizasiya xidmətlərinin əhalinin sağlamlığının qorunmasında oynadığı strateji rol barədə ətraflı məlumat verib.

Bərdə Rayon Mərkəzi Xəstəxanasının direktoru Vüsal Məmmədov, Qarabağ Universitetinin Tibb və sağlamlıq elmləri fakültəsinin professoru Mehmet Akman və Bərdə Rayon Mərkəzi Xəstəxanasının baş tibb bacısı Zərif Teymurovanın da qatıldığı sessiyada ilkin tibbi-sanitariya yardımında mövcud vəziyyət, qarşıda duran əsas vəzifələr, immunizasiya xidmətlərinin təşkili, səhiyyə sistemində multidissiplinar yanaşmanın rolu və səhiyyə işçilərinin sağlamlığın müdafiəsindəki məsuliyyəti ətrafında geniş müzakirələr aparılıb.

Sonda Tibb və sağlamlıq elmləri fakültəsində yaradılan şəraitlə tanış olunub, gələcəkdə ailə həkimlərinin yetişdirilməsi ilə bağlı fikir mübadiləsi aparılıb.