Tibb işçilərinin peşəkar hazırlığının artırılması məqsədilə maarifləndirici təlimlər keçirilib

29 Dekabr 2025

510

Tibb işçilərinin ekstremal şəraitlərdə çevik qərar qəbul etmə bacarıqlarının təkmilləşdirilməsi müasir səhiyyənin ən mühüm tələblərindən biridir. Bu məqsədlə Respublika Təcili və Təxirəsalınmaz Tibbi Yardım Mərkəzinin mütəxəssis tərəfindən tibb heyəti üçün “Allergik vəziyyətlərdə ilkin yardım” və “Neonatologiyada ilkin yardım” mövzularını əhatə edən genişmiqyaslı maarifləndirici təlim proqramı keçirilib.

Azmedinfo.az xəbər verir ki, təlim zamanı Mərkəzin həkim-təlimçisi Xuraman Abbasova iştirakçılara fövqəladə hallarda düzgün və operativ tibbi yardımın göstərilməsi metodikası, xüsusilə həyati təhlükə yarada biləcək kəskin allergik reaksiyalar (anafilaktik şok) zamanı ilkin müdaxilənin fundamental prinsiplərini ətraflı izah edib. Eyni zamanda, proqramın vacib hissəsini təşkil edən neonatologiya bölməsində yenidoğulmuşlara təxirəsalınmaz yardımın spesifik xüsusiyyətləri və kritik anlarda tətbiq olunacaq alqoritmlər tibbi personalın diqqətinə çatdırılıb.

Bu növ təlimlər tibb işçilərinin həm nəzəri biliklərini yeniləyir, həm də praktiki vərdişlərin mükəmməlləşdirilməsi sayəsində xəstələrin sağalma şansını əhəmiyyətli dərəcədə artırır.