Azərbaycan Respublikası Səhiyyə Nazirliyi Elmi-Tədqiqat Kardiologiya İnstitutunda (ETKİ) gənclərin tibbi biliklərinin artırılması və fərdi inkişafının dəstəklənməsi məqsədilə həyata keçirilən könüllülük proqramının növbəti seçim mərhələsinə başlanılıb.

Azmedinfo.az xəbər verir ki, artıq üçüncü ildir ki, uğurla davam etdirilən “ETKİ Könüllüləri” layihəsi çərçivəsində təşkil olunan bu imtahan mərhələsində namizədlərin həm nəzəri hazırlığı, həm də praktiki bacarıqları yoxlanılır.

Seçim prosesi zamanı institutun direktoru, professor Gülnaz Dadaşova imtahan iştirakçıları ilə görüşərək onlara öz tövsiyələrini çatdırıb və gələcək fəaliyyətlərində uğurlar arzulayıb. Professor vurğulayıb ki, bu cür layihələr gənc mütəxəssislərin peşəkar kadr kimi yetişməsində və səhiyyə sisteminə inteqrasiya olunmasında mühüm platforma rolunu oynayır.

Bilik və bacarıqların qiymətləndirilməsi məqsədilə namizədlərə təqdim olunan suallar onların kardiologiya sahəsinə olan marağını, ünsiyyət qabiliyyətlərini və komanda ilə işləmək potensialını üzə çıxarmağa xidmət edir. İmtahanlardan uğurla keçən gənclər institutun gündəlik iş mühiti ilə yaxından tanış olmaq, müasir müalicə metodlarını müşahidə etmək və tibbi-sosial layihələrdə iştirak etmək imkanı qazanacaqlar.